Հայոց ցեղասպանության թանգարան-ինստիտուտի ամսագիրը՝ Scopus-ի շտեմարանում

Հայոց ցեղասպանության թանգարան-ինստիտուտի «International Journal of Armenian Genocide
Studies» գիտական ամսագիրն ընդգրկվել է Scopus միջազգային գիտատեղեկատվական շտեմարանում: Այս մասին տեղեկացնում են Կրթության, գիտության, մշակույթի և սպորտի նախարարությունից։

Նախարարությունից հայտնում են՝ սա կարևոր և նշանակալի ձեռքբերում է ոչ միայն Հայոց ցեղասպանության թանգարան-ինստիտուտի, այլև հայոց ցեղասպանագիտության ոլորտի համար, որը վկայում է Հայոց ցեղասպանության հետազոտության զարգացող միջազգային արժեքի և գիտական հնչեղության մասին։

International Journal of Armenian Genocide Studies–ը Հայոց ցեղասպանության թանգարան-ինստիտուտի երկու գիտական ամսագրերից մեկն է։ Այն անգլերեն պարբերական է, հիմնադրվել է 2014 թվականին։ Մինչև 2021 թ. ամսագիրը լույս է տեսել տարեկան մեկ համարով, իսկ 2021 թվականից սկսած՝ երկու համարով։

Ամսագիրը բաց հասանելիության է: Խմբագրական խորհրդի կազմը միջազգային է. անդամների մոտ 80 տոկոսը արտասահմանյան գիտական հաստատությունների գիտնականներ են։

Այն գրանցված է DOAJ, Crossref և Ebsco համակարգերում: Տարեկան միջինում լույս են տեսնում 12–13 գիտական հոդված և գրախոսություն։

Անդրադառնալով ինդեքսավորման գործընթացին՝ «Հայոց ցեղասպանության թանգարան-ինստիտուտ» հիմնադրամի տնօրեն Էդիտա Գզոյանը նշել է, որ բոլոր նախապատրաստական աշխատանքները կատարելուց հետո՝ 2024 թվականի նոյեմբերին, ամսագրի խմբագրությունը պաշտոնապես դիմել է Scopus միջազգային գիտատեղեկատվական շտեմարանում ընդգրկվելու համար։ Մոտ վեց ամիս անց ստացվել է դրական պատասխանը։

Հավելենք, որ Scopus միջազգային հեղինակավոր գիտատեղեկատվական շտեմարանում ներկա պահին ընդգրկված է ևս 4 հայաստանյան պարբերական, որից 3-ը՝ Armenian Journal of Mathematics (սկսած 2008թ․-ից), New Armenian Medical Journal (սկսած 2009թ․-ից), Bulletin of Stomatology and Maxillofacial Surgery (2019-2020, 2022-2025թթ․) վերաբերում են բնական գիտությունների և բժշկագիտության ոլորտներին, իսկ 4-րդը՝ ԵՊՀ հրատարակչության «Translation Studies: Theory and Practice» ամսագիրն է, որը պաշտոնապես ընդգրկվել է «Scopus» գիտատեղեկատվական հեղինակավոր շտեմարանում 2025 թվականի մարտին և վերաբերում է հումանիտար ու հասարակագիտական ոլորտին։