ԱՄՆ-ը հայտնել է Ուկրաինայի վրա ՌԴ-ի հնարավոր բազմակողմ հարձակման մասին

Ամերիկայի Միացյալ Նահանգներում կարծում են, որ Մոսկվան կարող է պատրաստել ուժեղ բազմակողմ հարված՝ որպես շարունակական պատասխան Ուկրաինայի անվտանգության ծառայության «Սարդոստայն» գործողության շրջանակում ռուսական ռազմավարական թևավոր հրթիռների կրիչների վրա հարձակմանը։ Այս մասին հաղորդել է Reuters գործակալությունը՝ հղում անելով ամերիկացի պաշտոնյաներին։

DW-ի աղբյուրի կարծիքով՝ նման հարվածը կարող է իրականացվել «մի քանի օրվա ընթացքում» և լինելու է «ասիմետրիկ», այսինքն՝ նպատակներն անմիջականորեն չեն արտացոլելու ուկրաինական հարվածների ուղղությունները։ Մյուս աղբյուրը ենթադրում է, որ խոսքը, ամենայն հավանականությամբ, կվերաբերի համակցված հարվածի՝ հրթիռների և անօդաչու սարքերի միջոցով։

Արևմտյան դիվանագիտական աղբյուրի փոխանցմամբ՝ չնայած Ռուսաստանի պատասխան գործողությունները արդեն սկսվել են, ամենայն հավանականությամբ, դրանք կուժեղացվեն՝ հարվածներ հասցնելով Ուկրաինայի կարևոր օբյեկտներին, օրինակ՝ կառավարական շենքերին՝ փորձելով Կիևին հստակ ուղերձ հղել։

Հիշեցնենք՝ ամերիկյան հետախուզության տվյալներով՝ հունիսի 1-ին ուկրաինական օդային հարվածների արդյունքում Ռուսաստանի ռազմական օդանավակայանների վրա շարքից դուրս է եկել 20 ինքնաթիռ։ Մոտ տասը ինքնաթիռ ամբողջությամբ ոչնչացվել է, իսկ մնացածը՝ վնասվել։

Ավելի վաղ ՆԱՏՕ-ից հայտնել են, որ ընդհանուր առմամբ Ուկրաինային հաջողվել է ամբողջությամբ ոչնչացնել 10-ից 13 ռուսական ռազմավարական ինքնաթիռ։ Վնասազերծվել է ավելի քան 40 ինքնաթիռ՝ ինչը կազմում է Ռուսաստանի ռազմավարական ավիացիայի մոտ 30 տոկոսը։ Վնասված և ոչնչացված օդանավերի թվում են 15 Տու-95 ռազմավարական ռմբակոծիչներ, 12 Տու-22Մ3, ինչպես նաև առնվազն մեկ Ա-50 հեռահար ռադիոլոկացիոն հայտնաբերման ինքնաթիռ, մանրամասնել է աղբյուրը։ Ըստ գնահատականների՝ Ուկրաինայի հարվածների հասցրած ընդհանուր վնասը կազմում է 2-ից 7 միլիարդ դոլար (1,7-ից 6,1 միլիարդ եվրո)։

Ուկրաինայի Անվտանգության ծառայությունը և Զինված ուժերի գլխավոր շտաբը հայտնել էին, որ իրենց հաջողվել է շարքից հանել 41 օդանավ, այդ թվում՝ Տու-95, Տու-22Մ3 և Ա-50 տեսակի օդանավեր։ Այս տվյալները շուտով հաստատել էր ՆԱՏՕ-ի բարձրաստիճան ներկայացուցիչը՝ մեկնաբանություն տալով The Moscow Times պարբերականին։

Ուկրաինական կողմի խոսքով՝ գործողության նախապատրաստումը տևել է մեկուկես տարի։