Տիեզերական տվյալների օգտագործում՝ աղետների կառավարման համար. ՆԳՆ-ի նոր նախագիծը

Ներքին գործերի նախարարությունը հանրային քննարկման է ներկայացրել «Աղետների ռիսկի կառավարման ոլորտում տիեզերահեն տեղեկատվության օգտագործման և գործիքակազմի ձևավորման հայեցակարգը հաստատելու մասին» կառավարության որոշման նախագիծը։

Նշվում է, որ աղետների ռիսկի կառավարման ոլորտում տիեզերահեն տեղեկատվության կիրառման նպատակն է նպաստել ՀՀ-ում աղետներին և կլիմայի փոփոխությամբ պայմանավորված մարտահրավերներին դիմակայուն պետության կայացմանն ու զարգացմանը, ապահովել որակյալ աշխարհատարածական տեղեկատվության ու տիեզերական ծառայությունների ժամանակին և համակարգված կերպով հասանելիությունն աղետների ռիսկի կառավարման բոլոր փուլերում (ռիսկի նվազեցում, արձագանքում, հետաղետային վերակնգնում)՝ որոշումների կայացմանն ու գործողություններին աջակցելու համար:

«Հայաստանի Հանրապետությունը, ի դեմս Արտակարգ իրավիճակների նախարարության, 2021 թվականին պաշտոնապես դարձավ Հարավային Կովկասի և Կենտրոնական Ասիայի միակ պետությունը, որը հանդիսացավ Տիեզերքի և խոշոր աղետների միջազգային խարտիայի լիազորված օգտատեր: Դա թույլ է տալիս ուղղակիորեն դիմել Խարտիային՝ աղետի ժամանակ այն ակտիվացնելու համար, ինչպես նաև անհրաժեշտ տեղեկատվություն տրամադրել պետական կառավարման համակարգի, տեղական ինքնակառավարման այլ մարմիններին և համապատասխան կառույցներին:

Այն ակտիվացվել է Լոռու և Տավուշի մարզերում տեղի ունեցած ջրհեղեղների ժամանակ: Հայաստանի առաջին արբանյակը տիեզերքում է 2022 թվականի մայիսից, ինչն անկասկած կնպաստի Հայաստանի Հանրապետության տիեզերքի ոլորտում գործունեության զարգացմանը՝ մասնավորապես աղետների ռիսկի կառավարման ոլորտում»,-նշվում է նախագծի հիմնավորման մեջ։

Նախագիծը հանրային քննարկման ներկայացված կլինի մինչև հունիսի 27-ը։