Հակակոռուպցիոն կոմիտեն ձերբակալել է Պտղնիի նախկին համայնքապետին և որդուն

Հակակոռուպցիոն կոմիտեում քննվող քրեական վարույթի շրջանակում ձերբակալվել են Կոտայքի մարզի Պտղնի համայնքի նախկին ղեկավարն ու ևս 3 անձինք: Այս մասին FactorTV-ի հարցմանն ի պատասխան հայտնեցին Հակակոռուպցիոն կոմիտեից.

«Նախկին պաշտոնատար անձը մեղադրվում է խարդախության և վատնման եղանակներով առանձնապես խոշոր չափերով հափշտակության, պաշտոնեական լիազորություններն անցնելու, պաշտոնեական կեղծիք կատարելու և առանձնապես խոշոր չափերով փողերի լվացման մեջ: Ձերբակալված մյուս անձինք մեղադրվում են համայնքի նախկին ղեկավարի կողմից վերը նշված առերևույթ հանցանքների կատարմանն օժանդակելու և փողերի լվացման մեջ»,- նշեց Կոմիտեի մամուլի քարտուղար Մարինա Օհանջանյանը։

Factor TV-ի տեղեկություններով՝ ձերբակալվածների թվում են ոչ միայն Կոտայքի մարզի Պտղնի համայնքի նախկին ղեկավար Առաքել Վիրաբյանը, այլև նրա որդին։

Քրեական վարույթն առնչվում է Պտղնի համայնքի վարչական սահմաններում գտնվող պետական և համայնքային 23 միավոր հողերի հափշտակությանն ու փողերի լվացմանը:

Հիշեցնենք՝ «Հետք»-ը գրել էր, որ 2021 թվականին Պտղնի համայնքում մոտ 1 հա հողատարածքն օտարվել է 150 հազար դրամով: Հետագայում այդ հողատարածքը բաժանվել է առանձին մասերի ու վաճառվել թանկ գնով, ընդհուպ՝ փոխանակվել 600 մլն դրամ արժողությամբ բնակարանի հետ:

Հողամասերի աճուրդ-վաճառքը սննկացման եզրին է կանգնեցրել «Գնդասար» ՓՀԷԿ-ին: Ընկերությունն այդ տարածքում սերվիտուտով համայնքային հողատարածք է օգտագործել՝ ՓՀԷԿ-ը շահագործելու նպատակով: ՍՊԸ-ին հանձնված հողամասում և դրա հարակից տարածքներում սկսվել են հողային աշխատանքներ, որոնք վնասել են ՓՀԷԿ-ի խողովակաշարը։ Այժմ ընկերությունը չի աշխատում, իսկ վնասները վերականգնված չեն:

Ռոզա Վարդանյան