Բաքվում Արցախի ղեկավարների շինծու գործերով նիստում ուսումնասիրվել են, իբր, «ՀՀ-ի կողմից Ադրբեջանի էկոլոգիային և տնտեսությանը վնաս հասցնելու վերաբերյալ փաստաթղթեր»

Բաքվի զինվորական դատարանում ընթանում է Արցախի ղեկավարների և այլ պաշտոնյաների՝ ընդհանուր 15 անձի նկատմամբ հարուցված շինծու գործերով հերթական դատական նիստը։ Ադրբեջանական լրատվամիջոցերի հաղորդմամբ՝ այսօրվա նիստում ուսումնասիրվել են փաստաթղթեր, որոնք վերաբերում են, իբր, «պատերազմի ընթացքում Հայաստանի կողմից Ադրբեջանի էկոլոգիային և տնտեսությանը դիտավորյալ վնաս հասցնելուն»։

Նշվում է, որ Արցախի տարածքների գրավումից հետո իրականացվել են ստուգումներ, որոնց ընթացքում որոշվել է յուրաքանչյուր շրջանի և գյուղի վնասը։

Պետական ​​մեղադրողը տվյալներ է հրապարակել, իբր, «Զանգելանի, Ջաբրայիլի, Ֆիզուլիի, Գուբադլիի, Աղդամի, Մարտունիի, Շուշիի, Լաչինի և Քարվաճառի շրջաններում շրջակա միջավայրին և տնտեսությանը հասցված վնասի վերաբերյալ, որը ներառում է ինչպես ծառերի ոչնչացումը, այնպես էլ օգտակար հանածոների հանքավայրերի անօրինական շահագործումը»։

Նշվում է, թե «թալանի արդյունքում ստացված եկամուտները կամ այլ նյութական ակտիվներն օգտագործվել են հայկական բանակի կողմից կազմավորված զինված ստորաբաժանումներին, օտարերկրյա պետություններից վարձկաններին ֆինանսավորելուն, նրանց տարբեր տեսակի զենքեր, հագուստ, սնունդ և այլնով ապահովելու, զինված կազմավորումների մարտական ​​պատրաստվածությունը բարձրացնելու համար»։

Հիշեցնենք՝ հունիսի 3-ին տեղի ունեցած նախորդ դատական նիսոտւմ ներկայացվել էր, իբր, Արցախյան 44-օրյա պատերազմի  ժամանակ Բաքու-Թբիլիսի-Ջեյհան նավթամուղի թիրախավորումը, տարբեր բնակավայրերի ենթակառուցվածներին հասցված վնասը։

Թարգմանությունը՝ Էմմա Չոբանյանի