«Փաշինյա՞նն է պահել այս ազգին, թե՞ եկեղեցին, չկա այնպիսի հարց, որին չի կարող խառնվել Հայ եկեղեցին». աստվածաբան

«Ով գտնի սրբապիղծ սրբազան, թող հարցը լուծի»,- Factor TV-ի հարցին ի պատասխան այսպես մեկնաբանեց Նիկոլ Փաշինյանի գրառումն աստվածաբան Վարդան Խաչատրյանը։

Հիշեցնենք՝ վարչապետ Նիկոլ Փաշինյանը մի քանի օր է եկեղեցուն և եկեղեցականներին վերաբերող գրառումներ է կատարում։ Այսօր ևս վարչապետը ֆեյսբուքյան էջում անդրադարձել է կուսակրոնությունը խախտած հոգևոր հայրերին.

«Խորհրդային Միության ժամանակ մի անեկդոտ կար։ Կարմիր հրապարակում թռուցիկներ են գտնում, որոնց վրա գրված է․ «Քաղբյուրոյին գնդակահարել, Կրեմլի պատերը ներկել կանաչ»։ Հայկական ռադիոն արձագանքում է․ «Իսկ ինչու՞ կանաչ»։ Հիմա որքան հասկանում եմ, մայիսի 29-ի իմ մի գրառման արձագանքը հետևյալն է․«Իսկ ինչու՞ դոմփել»։ Մնացած մասով փաստորեն կոնսենսուս ունենք, որ սրբապիղծ «սրբազանների» հարցը պետք է լուծել։ Իսկ առաջարկությունները, դիտողությունները, քննադատությունները «սրբազանների» մասին հետագա գրառումներում նկատի կունենամ»,- գրել է նա։

«Նախ թող գտնի սրբապիղծ, հետո, եթե ուժը պատի, թող փորձի հարցը լուծել։ Իրեն հաջողություն եմ մաղթում»,- նշեց Խաչատրյանը։

Մայր Աթոռը գրառումների մասով պաշտոնական որևէ արձագանք չի տվել։ Այս մասով Խաչատրյանը համաձայն է եկեղեցու որդեգրած քաղաքականության հետ. «Ո՞վ իրավունք ունի թելադրելու, թե Մայր Աթոռն ինչ պետք է անի կամ ում արձագանքի, չկա նման ուժ»։

Factor TV-ի հարցին՝ իսկ հնարավո՞ր է այլ ճանապարհներով հոգևորականների մասին տեղեկություններ հրապարակվեն առաջիկայում, աստվածաբանը շեշտեց.

«Դա կարող է լինել ԱԱԾ-ի կողմից, որը, եթե տրամադրի վարչապետին, ինչի իրավունքը չունի, և եթե Փաշինյանն այդ տվյալները հրապարակի, կրկին իրավունք չի ունենա։ Կուսակրոնն էլ անձնական կյանքի պաշտպանության իրավունք ունի։ Եկեղեցին է այս ազգի տերն ու տիրականը, Փաշինյա՞նն է պահել այս ազգին, թե՞ եկեղեցին, չկա այնպիսի հարց, որին չի կարող խառնվել Հայ եկեղեցին»։

Ռոզա Վարդանյան