Կաթի կուժ, շաքարաման և պղնձե քանդակ․ Ալեն Սիմոնյանը թանկարժեք նվերներ է ստացել

Կիպրոսի Ներկայուցիցչների պալատի նախագահ Անիտա Դիմիտրիուն կղզու պատկերով պղնձե քանդակ է նվիրել ՀՀ Ազգային ժողովի նախագահ Ալեն Սիմոնյանին։ Այս մասին Factor.am-ը տեղեկանում է Ալեն Սիմոնյանի՝ Կոռուպցիայի կանխարգելման հանձնաժողով ներկայացրած հայտարարագրից։ 

Ալեն Սիմոնյանը նվերը ստացել է մայիսի 19-ին՝ Կիպրսի Հանրապետության Ներկայացուցիչների պալատի նախագահի գլխավորած պատվիրակության այցի ժամանակ։ Նվերի արժեքը կազմել է 100,280 դրամ։ Հանրային պաշտոն զբաղեցնող անձի նվերների հաշվառման ձևաթղթում նշվում է, որ արժեքի գնահատման համար հիմք են հանդիսացել կիպրոսցի գործընկերների տված տեղեկությունները։ 

Մայիսին Ալեն Սիմոնյանը ևս երկու նվեր է հաշվառել ԿԿՀ։ Ղազախստանի խորհրդարանի Մաժիլիսի նախագահ Երլան Կոշանովը թեյաման, կաթի կուժ, շաքարաման և 6 բաժակ՝ ափսեներով նվիրել է Սիմոնյանին։ ԱԺ նախագահը նվերը ստացել է մայիսի 12-16-ը Աստանա կատարած այցի շրջանակում։ Նվերի արժեքը գնահատվել է 113, 400 դրամ։ 

Նույն այցի շրջանակում Սիմոնյանը 187 հազար դրամանոց ազգային հագուստ (գլխարկ և պատմուճան) է նվեր ստացել Ղազախստանի խորհրդարանի Սենատի նախագահ Մաուլեն Աշիմբաևից։ Արժեքի գնահատման համար հիմք է հանդիսացել ղազախ գործընկերների կողից փոխանցված տեղեկատվությունը։

Հիշեցնենք՝ «Հանրային ծառայության մասին» օրենքում կատարված փոփոխությունների արդյունքում սահմանվել են հանրային ծառայողների կողմից նվերներ ընդունելու վերաբերյալ նոր կանոններ։ Ըստ այդ կարգավորումների՝ պետությանը կամ համայնքին են հանձնվում պետական, պաշտոնական այցերի, միջոցառումների, ինչպես նաև աշխատանքային այցերի, գործուղումների շրջանակում տրվող նվերները, եթե դրանց արժեքը գերազանցում է 60,000 ՀՀ դրամը: 

Անի Թամրազյան