23.04.2026 | 19:14
Մեր վարչապետի թեկնածուն Վաղարշակ Հարությունյանն է. Ռեֆորմիստներ կուսակցության նախագահ. ՏԵՍԱՆՅՈՒԹ
ԲԴԽ երկու անդամ ինքնաբացարկ է հայտնել Վարչական վերաքննիչ դատարանի դատավորների գործով
Հասարակություն
02.06.2025 | 13:22
Բարձրագույն դատական խորհրդի երկու անդամ՝ Քրիստինե Մկոյանը և Կարեն Թումանյանն ինքնաբացարկ են հայտնել Վարչական վերաքննիչ դատարանի դատավորներ Հրաչ Այվազյանի, Կարեն Ավետիսյանի և նույն դատարանի նախագահ Ռուստամ Մախմուդյանի գործով։
Քրիստինե Մկոյանը հայտնել է, որ նախկինում որպես դատավոր առնչվել է այն գործին, որի կապակցությամբ կարգապահական վարույթ է հարուցվել դատավորների նկատմամբ, իսկ Կարեն Թումանյանը հայտնել է, որ մտերիմ հարաբերություններ ունի Հրաչ Այվազյանի հետ։
ԲԴԽ-ն ինքնաբացարկի երկու միջնորդություններն էլ բավարարել է։
Այսօր հրավիրված ԲԴԽ նիստին կարգապահական գործով անցնող դատավորները չէին ներկայացել։ Նրանց ներկայացուցիչ,փաստաբան Գնել Մուղնեցյանը գրությամբ ԲԴԽ-ին հայտնել էր, որ այլ ծանրաբեռնվածություն ունի, այդ պատճառով ԲԴԽ-ն որոշում կայացրեց հետաձգել նիստը։
Հիշեցնենք՝ Factor TV-ն մայիսի 20-ին գրել էր այն մասին, որ կարգապահական վարույթը հարուցվել է դատական ակտերից մեկով իրավական նորմին Վերաքննիչ վարչական դատարանի դատական կազմի կողմից տրված մեկնաբանության հետ։
Թե՛ ՀՀ Սահմանադրությամբ, թե՛ Դատական օրենսգրքով սահմանվում է, որ դատավորը չի կարող պատասխանատվության ենթարկվել արդարադատություն իրականացնելիս հայտնած կարծիքի կամ կայացրած դատական ակտի համար, բացառությամբ երբ առկա են հանցագործության կամ կարգապահական խախտման հատկանիշներ:
Թե տվյալ դեպքում դատավորի դատական ակտում ինչն է դիտարկվում որպես կարգապահական խախտում, մեզ հայտնի չէ, քանի որ ԲԴԽ միջնորդություն ներկայացրած Արդարադատության նախարարի ներկայացուցիչները դեռևս չեն ներկայացրել միջնորդությունը։
Նշենք նաև, որ գործը, որով կայացված որոշումը հանգեցրել է կարգապահական վարույթ հարուցելուն, նախագահել է դատավոր Հրաչ Ակվազյանը, իսկ Ռուստամ Մախմուդյանը և Կարեն Ավետիսյանը եղել են դատական կազմի դատավորներ։
Արաքս Մամուլյան
