Ներկայացվել է Հայաստանում ընտանեկան և կենցաղային բռնության հարցերով թեժ գծի ներդրման նախագիծը

Աշխատանքի և սոցիալական հարցերի նախարար Նարեկ Մկրտչյանի նախագահությամբ այսօր կայացել է Ընտանեկան և կենցաղային բռնության կանխարգելման խորհրդի նոր կազմով առաջին նիստը։ «Վստահ եմ, որ այս հարթակը կդնի համագործակցային նոր ձևաչափի սկիզբ՝ ի նպաստ ընտանեկան և կենցաղային բռնության կանխարգելման»,- մասնավորապես ասել է նախարարը։

«Այս հարթակը համատեղ փորձի փոխանակման և համակարգային բարեփոխումների ձևավորման մասին է, որտեղ մենք կարող ենք քննարկել քաղաքականության բացերը, վերլուծել ընթացիկ ծրագրերի արդյունավետությունը և պետական մարմիններին ներկայացնել հիմնավորված առաջարկներ՝ օրենսդրական փոփոխությունների, հանրային իրազեկման արշավների իրականացման և այլ ուղղություններով։ Խորհուրդը գործելու է թափանցիկության և հանրային ներգրավվածության սկզբունքներով։ Վստահ եմ, որ մեր միասնական ուժերով կարող ենք ոչ միայն արձագանքել բռնության դեպքերին, այլև նախևառաջ կանխել դրանք»,- գերատեսչության փոխանցմամբ՝ նշել է նախարարը։

Խորհրդի անդամներին ողջունել է նաև ՄԱԿ–ի Բնակչության հիմնադրամի հայաստանյան գրասենյակի Գենդերային ծրագրերի ղեկավար Թագուհի Հարությունյանը․

«Ընտանեկան և կենցաղային բռնության կանխարգելման խորհրդի նիստը կազմված է կառույցներից, որոնք երկար տարիներ մեծ աշխատանք են կատարում ոլորտի կայացման, ընտանեկան բռության ենթարկված անձանց աջակցման գործում։ Ուրախ եմ, որ այսօր ունենք նաև ոլորտը կարգավորող ռազմավարություն և վստահ եմ, որ խորհրդի աշխատանքները կօգնեն ռազմավարությունը կյանքի կոչել, ինչպես նաև ընտանեկան բռնության ենթարկված անձանց բազմամասնագիտական, պատշաճ աջակցություն տրամադրել»։

Նիստի շրջանակում ԱՍՀՆ և Համաշխարհային բանկի փորձագիտական թիմը ներկայացրել է Հայաստանում ընտանեկան և կենցաղային բռնության հարցերով թեժ գծի ներդրման նախագիծը։