14.02.2026 | 23:13
Ալիևը Ռուսաստանին մեղադրել է Կիևում Ադրբեջանի դեսպանատանը հարվածելու համար
Ավելի քան 10 հազար ԱՄՆ դոլար՝ Տիգրան Ավինյանի գլխավորած պատվիրակության լոնդոնյան 4-օրյա գործուղման համար
Տնտեսություն
30.05.2025 | 17:41
Երևանի քաղաքապետ Տիգրան Ավինյանի գլխավորած պատվիրակությունը մայիսի 12-ից 16-ը գործուղվել էր Լոնդոն։ Պատվիրակության կազմում ընդգրկված էին Երևանի քաղաքապետի օգնական Արման Լազրյանը, Երևանի քաղաքապետարանի աշխատակազմի տրանսպորտի վարչության պետ Վազգեն Հարությունյանը և «Երևանի կառուցապատման ներդրումային ծրագրերի իրականացման գրասենյակ» ՀՈԱԿ-ի տնօրենի ժամանակավոր պաշտոնակատար Անետա Բաբայանը։
Factor.am-ը գրավոր հարցում էր ուղարկել Երևանի քաղաքապետարան՝ պարզելու, թե որքան է կազմել պատվիրակության այցի ընդհանուր բյուջեն։
Այսպես, ինչպես Տիգրան Ավինյանի, այնպես էլ Արման Լազրյանի և Վազգեն Հարությունյանի ավիատոմսի արժեքը կազմել է 266,888 ՀՀ դրամ, իսկ օրապահիկը՝ 277,134 ՀՀ դրամ։ Լազրյանի և Հարությունյանի վիզայի կենտրոնի վճարը կազմել է 39,041 ՀՀ դրամ, իսկ վիզայի վճարը՝ 60,995 ՀՀ դրամ։
Երևանի քաղաքապետ Տիգրան Ավինյանի գիշերավարձի գումարը կազմել է 612,105 ՀՀ դրամ։ Պատվիրակության մյուս անդամների գիշերավարձը համեմատաբար ավելի քիչ է եղել․ Արման Լազրյանի դեպքում՝ 263,431 ՀՀ դրամ, իսկ Վազգեն Հարությունյանի դեպքում՝ 278,836 ՀՀ դրամ։
Անետա Բաբայանի գործուղման ծախսերը հոգացել է «Երևանի կառուցապատման ներդրումային ծրագրերի իրականացման գրասենյակ» ՀՈԱԿ-ը։ Չորս օրվա օրապահիկի համար վճարվել է 221,111 ՀՀ դրամ, հյուրանոցի արժեքը կազմել է 294,870 ՀՀ դրամ, մասնակցության վճարը՝ 421,200 ՀՀ դրամ, իսկ ավիատոմսը՝ 241,727 ՀՀ դրամ։
Ստացվում է, որ Տիգրան Ավինյանի գլխավորած պատվիրակության Լոնդոն այցի ընդհանուր ծախսը կազմել է 4,165,418 ՀՀ դրամ, որից 1,178,908 ՀՀ դրամը ծախսվել է ոչ թե Երևանի բյուջեից, այլ «Երևանի կառուցապատման ներդրումային ծրագրերի իրականացման գրասենյակ» ՀՈԱԿ-ի միջոցներից։
Արփի Հակոբյան
