Փաշինյանից հետո՝ Քոչարյանը․ ինչ վարկանիշ ունեն ներկա ու նախկին ղեկավարները. ՏԵՍԱՆՅՈՒԹ

Այլևս առաջվանը չէ ժողովրդի վարչապետի վարկանիշը․ Նիկոլ Փաշինյանի ռեյտինգը գահավիժել է։ Կովկասի հետազոտական ​​ռեսուրսների կենտրոնի՝ CRRC-ի 2024 թվականի հետազոտության համաձայն՝ Փաշինյանն ու իր գլխավորած «Քաղաքացիական պայմանագիր» կուսակցությանը վստահում է հարցմանը մասնակցածների 15 տոկոսը։

ՔՊ-ական պատգամավոր Էդուարդ Աղաջանյանին շփոթեցնում են Փաշինյանի վարկանիշի գահավիժումն արձանագրող հարցումների թվերը։ Կառավարող ուժի ներկայացուցիչն ասում է՝ իր պատկերացրած օբյեկտիվ հարցումներով է ուզում ստուգել իր առաջնորդի վարկանիշը։

Ամերիկյան Միջազգային հանրապետական ինստիտուտի իրականացրած հարցումների համաձայն էլ՝ Հայաստանի քաղաքացիների միայն 17 տոկոսի վստահությունն ունի Փաշինյանը։ ՔՊ-ի վարկանիշի նվազման մասին են խոսում նաև հայաստանյան ընտրությունների արդյունքները։ Եթե հեղափոխությունից կարճ ժամանակ անց տեղի ունեցած խորհրդարանական ընտրություններում Փաշինյանի ուժին քվե տվողները շուրջ 885 հազար  էին, ապա 2021-ին թիվը կրճատվեց 197 հազար 450-ով։ Չնայած այս տարիների ընթացքում Փաշինյանի վարկանիշի վրա բացասաբար են ազդել 44-օրյա պատերազմում պարտությունը, Արցախի կորուստն ու հայաթափումը, Բաքվում պահվող ռազմագերիների վերադարձի խնդիրը, սա չի խանգարում Ալեն Սիմոնյանին պարբերաբար հայտարարել, որ եթե առաջիկա օրերին էլ ընտրություններ լինեն, ՔՊ-ն մեծամասնություն է ձևավորելու։

Էդուարդ Աղաջանյանը հակված չէ Ալեն Սիմոնյանի նման բարձրագոչ հայտարարություններ անել։ Նա, ամեն դեպքում, կարծում է, որ ՔՊ-ն աշխատելու տեղ ունի։

Հետազոտական կենտրոնը նախորդ տարվա հուլիսի 27-ից հոկտեմբերի 10-ն ընկած ժամանակահատվածում է անցկացրել հարցումը 1,561 քաղաքացիների շրջանում։ Ի դեպ, նրանց 50 տոկոսն ընդհանրապես չի վստահում Ալեն Սիմոնյանի ղեկավարած Ազգային ժողովին։

Որևէ քաղաքական ուժի չի վստահում հարցվածների 55 տոկոսը։ Իսկ ահա Նիկոլ Փաշինյանից հետո ամենավստահելի գործիչը Ռոբերտ Քոչարյանն է՝ իր ղեկավարած «Հայաստան» դաշինքով։ Քոչարյանին վստահում է հարցվածների չորս տոկոսը։ Ռոբերտ Քոչարյանի գլխավորած դաշինքի մաս կազմող ՀՅԴ-ին վստահողների շրջանակն էլ չի գերազանցում երկու տոկոսը։ Դաշնակցական Գեղամ Մանուկյանին անակնկալի են բերում այս ցուցանիշները։ Նա պնդում է, որ փողոցում լրիվ այլ վերաբերմունքի է արժանանում։

Համեմատաբար բարձր՝ 4 տոկոս վստահություն ունի բազմաթիվ քրեական գործերով անցնող, ընտրական գործընթացներում, այսպես ասած, «ղազագրերի» ինստիտուտի ներդրման մեջ մեղադրվող Գագիկ Ծառուկյանի ղեկավարած ԲՀԿ-ն։  Սա ուշագրավ է՝ հաշվի առնելով, որ Ծառուկյանը 2021-ից հետո ակտիվ քաղաքական գործընթացներում ներգրավված չէ։ Իսկ ահա Սերժ Սարգսյանի ղեկավարած ՀՀԿ-ին վստահում է հարցվածների երկու տոկոսը։

Մանրամասները՝ տեսանյութում։

Նարեկ Կիրակոսյան