04.08.2026 | 16:32
MMA-ի պատմության 5 մեծագույն մարտիկները՝ ըստ Արման Ծառուկյանի
Գոռ Թադևոսյանն ու Էդգար Գրիգորյանը պետք է կիսեին Քննչական կոմիտեից հափշտակված 590 հազար դոլարը․ մանրամասներ՝ ցուցմունքից
Հասարակություն
27.05.2025 | 17:30
Քննչական կոմիտեից հափշտակված 590 հզ դոլար գումարի գործով մեղադրյալ Էդգար Գրիգորյանը ցանկանում էր բնակարան գնել։ Այս մասին մեղադրյալը խոստովանական ցուցմունք է տվել:
Գրիգորյանի պաշտպան Աշոտ Ապրեսյանը Factor TV-ի հետ զրույցում ասաց, որ իր պաշտպանյալը գումարի 90%-ը վերականգնել է, առաջին իսկ պահից արարքը խոստովանել է, նկարագրել է դեպքի հանգամանքները, օժանդակել է հանցագործությունը բացահայտելուն, զղջում է կատարածի համար։
«Գրիգորյանը պատերազմի մասնակից է, երկու մանկահասակ երեխա ունի, հայրը պատերազմում զոհված է, բնակարան չունի։ Ցուցմունք է տվել այն մասին, որ հայրը պատերազմում զոհվել է, մայրը երեխաներին միայնակ է մեծացրել, ու այս կյանքից պիտի հեռանար՝ առանց իր գլխին տանիք ունենալու։ Իր միակ նպատակը, որ գոնե մոր համար տուն ձեռք բերեր»,- մեզ հետ զրուցում պատմեց Աշոտ Ապրեսյանը։
Փաստաբանը հրաժարվեց դեպքի վերաբերյալ կամ Գրիգորյանի ցուցմունքից այլ հանգամանքներ հայտնել։ Այնուամենայնիվ, մեզ հայտնի են դարձել որոշ մանրամանսեր՝ կապված Գրիգոյանի և Գոռ Թադևոսյանի միջև կապի, պայմանավորվածությունների և գործի այլ հանգամանքների վերաբերյալ։
Քրեական վարույթում առկա տվյալների համաձայն՝ 590 հզ դոլար գումարն առգրավվել էր Քննչական կոմիտեի Տնտեսական հանցագործությունների և մաքսանենգությունների քննության գլխավոր վարչությունում քննվող քրեական վարույթով՝ խուզարկության արդյունքում։
Երբ գործով քննիչը արձակուրդ է մեկնել, սենյակի չհրկիզվող պահարանի բանալիները հանձնել է վարչության պետի ժամանակավոր պաշտոնակատար Գոռ Թադևոսյանին և այդ ժամանակ բանալիները պատճենահանվել են։
Մեր տեղեկություններով՝ Գրիգորյանը նաև ցուցմունք է տվել այն մասին, որ ինքն ու Թադևոսյանը պետք է կիսեին գումարը։
Նշենք, որ Թադևոսյանը ևս խոստովանական ցուցմունք է տվել, սակայն նրա պաշտպանները Factor TV-ի հետ զրույցում հրաժարվեցին մեկնաբանություններ տալ։
Արաքս Մամուլյան
