Վրաստանում ձերբակալվել է Բիձինա Իվանիշվիլիի նախկին մերձավորը, որը սահմանը հատելով՝ հայտնվել էր ՀՀ-ում

Վրաստանի պետական ​​անվտանգության ծառայությունը (ՊԱԾ) հաստատել է Գիորգի Բաչիաշվիլիի ձերբակալությունը, գրում են վրացական լրատվամիջոցները։

Պաշտոնական հաղորդագրության համաձայն՝ «2025 թվականի մայիսի 26-ին Պետական ​​անվտանգության ծառայությունն անանուն հաղորդագրություն է ստացել այն մասին, որ Գիորգի Բաչիաշվիլին, որն ունի Վրաստանի և Ռուսաստանի կրկնակի քաղաքացիություն, դատապարտված է և հետախուզվում է կարմիր ծանուցագրով (Ինտերպոլ), տեղաշարժվում է Վրաստանի Կարմիր կամրջի և Սադախլոյի միջև գտնվող, այսպես կոչված, կանաչ սահմանային հատվածի մոտ»։

Բաչիշվիլին ձերբակալվել է «հետաքննչական և օպերատիվ-հետախուզական միջոցառումների արդյունքում»։ Հետաքննությունը վարում է Անվտանգության Ծառայության Կոռուպցիայի դեմ պայքարի գործակալությունը՝ Վրաստանի Քրեական օրենսգրքի 344-րդ հոդվածի 1-ին մասի համաձայն, որը վերաբերում է սահմանի անօրինական հատմանը և պատժվում է 3-ից 5 տարի ժամկետով ազատազրկմամբ։

Բաչիաշվիլին մեղադրվում է 2015-2022 թվականներին իր կողմից կառավարվող կրիպտոարժույթային ներդրումային նախագծից մի քանի միլիոն դոլար հափշտակելու մեջ: Հետաքննությունը պնդում է, որ նա, ենթադրաբար, թաքցրել է ստացված եկամուտները և միջոցների մի մասը «լվացել» օֆշորային սխեմաների միջոցով։

Գիորգի Բաչիաշվիլին Վրաստանի իշխող «Վրացական երազանք» կուսակցության հիմնադիր և պատվավոր նախագահ Բիձինա Իվանիշվիլիի մտերիմ գործընկերն էր, 2013 թվականին եղել է Վրաստան արտասահմանյան ներդրումներ ներգրավելու համար ստեղծված համատեղ ներդրումային հիմնադրամի գործադիր տնօրենը։ Նրա դեմ գործը հարուցվել էր 2023 թվականին՝ Իվանիշվիլիի հայտարարության հիման վրա։

Դատախազությունը Բաչիաշվիլիին մեղադրել է 39,215,820 դոլարի կրիպտոարժույթ գողանալու մեջ։ 2023 թվականի հուլիսի 6-ին Թբիլիսիի քաղաքային դատարանը նրա նկատմամբ խափանման միջոց է ընտրել՝ 2,5 միլիոն լարի գրավի տեսքով։ 2025-ի մարտի սկզբին հայտնի է դարձել, որ Գիորգի Բաչիաշվիլին լքել է Վրաստանը։ Դատախազությունը նրա նկատմամբ հետախուզում է հայտարարել։

Բաչիաշվիլին Վրաստանից հեռացել է՝ վկայակոչելով քաղաքական հետապնդումները և կյանքին սպառնացող սպառնալիքները։ Նա պնդում է, որ մեղադրանքները շինծու են և քաղաքական դրդապատճառներով, որոնք ծագել են Իվանիշվիլիի հետ՝ ռուսամետ դիրքորոշման և այլախոհության դեմ պայքարի պատճառով առաջացած վեճից։

Չնայած դատարանի կողմից սահմանված ճանապարհորդության արգելքին և անձնագրի առգրավմանը՝ Բաչիաշվիլիին հաջողվել է փախչել երկրից՝ հատելով Հայաստանի սահմանը, որտեղ նա ներկայացրել է ռուսական անձնագիր։

Վրաստանի ՆԳՆ-ն հայտնել էր, որ Բաչիաշվիլին մարտի 2-ին լքել է վրացական սահմանը՝ շրջանցելով սահմանային անցակետը, օգտագործելով հատուկ թաքստոցը մեքենայում, ապա ռուսական անձնագրով անցել է Հայաստանի սահմանային անցակետով։ Հայկական կողմն այս տեղեկությունները չէր մեկնաբանել։

Բաչիաշվիլին հայտարարել էր, որ իր փախուստը հեշտացնելու համար օգտագործել է «համակարգի բացերը», այդ թվում՝ համակարգի ներսում գտնվող անհատների օգնությունը։ Բաչիշվիլիի միջազգային իրավաբանական թիմն էլ պնդում է, որ նրան «բռնի ուժով են վերադարձրել» Վրաստան։

Թարգմանությունը՝ Էմմա Չոբանյանի