09.01.2026 | 23:22
Հայաստանի դահուկային սպորտի ֆեդերացիայի նախագահը պատասխանել է ԿԳՄՍ նախարարին․ ՏԵՍԱՆՅՈՒԹ
2 խոշոր գնում՝ 1 տարում․ Առողջապահական և աշխատանքի տեսչական մարմնի ղեկավարը Վրաստանում բնակարան է գնել
Հասարակություն
26.05.2025 | 12:29
Առողջապահական և աշխատանքի տեսչական մարմնի ղեկավար Սլավիկ Սարգսյանը 2024 թվականին 2 խոշոր գնում է կատարել։ Կոռուպցիայի կանխարգելման հանձնաժողով նրա ներկայացրած հայտարարագրի համաձայն Սարգսյանը 2024-ին 45 հազար դոլարով բնակարան է գնել Վրաստանում Նիզուլի Ալիևից, ևս 41․9 մլն դրամ փոխառություն է տվել «Օրդ Դեվելոփմենթ» ՍՊ ընկերությանը, որը Երևանում «Կոմիտաս պարկ» բնակելի թաղամասի կառուցապատողն է, այսինքն՝ կառուցվող շենքում բնակարանի գնման իրավունք է ձեռք բերել։
Այս 2 անշարժ գույքը Սարգսյանը ձեռք է բերել հիփոթեքային վարկերով, որոնց մայր գումարը տարեվերջին եղել է 33․7 հազար դոլար և 37․3 մլն դրամ, սակայն թե որ բանկերից է նա այդքան վարկ վերցրել, Սարգսյանը չի հայտարարագրել։ Տեսչական մարմնի ղեկավարը այլ 2 վարկեր էլ ունի՝ գրեթե 7 մլն դրամ ծավալով։
2024-ի տարեվերջին նրա բանկային հաշիվներին եղել է ընդամենը 246 դոլար, մոտ 1․5 մլն դրամ, իսկ կանխիկ ունեցել է 3․7 մլն դրամ։ Սարգսյանը ԱԱՏՄ-ից ստացել է 14․6 մլն դրամ աշխատավարձ, եկամտահարկի վերադարձի գումարը կազմել է 2․7 մլն դրամ։ Վարկերի մարմանն անցած տարի ուղղել է 8․5 մլն դրամ, միանվագ ծախսել է 10 հազար դոլար և 4․2 մլն դրամ։
Սարգսյանը ևս 1 բնակարան (1/6 բաժնային սեփականություն) ունի Մեղրիում 1994-ից, վարում է 2023-ին գնված MAZDA մակնիշի ավտոմեքենա։
Սլավիկ Սարգսյանի կինը՝ Աննա Մինասյանը, Կոտայքի Նոր գյուղ համայնքում 2022-ից 2 հողամաս ունի։ Նրա բանկային հաշվին տարեվերջին եղել է 323 հազար դրամ, կանխիկ միջոցներ չի հայտարարագրել։ Մինասյանն աշխատում է «Ալեքս հոմ» ընկերությունում և անցած տարի ստացել է 3․6 մլն դրամ աշխատավարձ, 601 հազար դրամ էլ ստացել է եկամտահարկի վերադարձ։
