19.04.2026 | 23:45
Գետերում նկատվում է ջրի մակարդակի բարձրացում. ՆԳՆ ՓԾ-ն անցել է ուժեղացված ծառայության
ԵԽԽՎ-ն կոչ է անում Ադրբեջանին ազատ արձակել, իբր, ՀՀ-ի օգտին լրտեսության համար 18 տարով ազատազրկված թալիշ հետազոտողին
Քաղաքականություն
23.05.2025 | 20:43
ԵԽԽՎ քաղբանտարկյալների հարցերով գլխավոր զեկուցող Ազադե Ռոժհանը (Շվեդիա, Սոցիալական խտրականության դեմ պայքարի խմբակցություն) հայտարարություն է տարածել թալիշ պատմաբան և ազգագրագետ Իգբալ Աբիլովի՝ Ադրբեջանում պետական դավաճանության մեղադրանքով դատապարտման վերաբերյալ։
«Ես խորապես մտահոգված եմ Լենքորանի ծանր հանցագործությունների դատարանի մայիսի 20-ի դատավճռով, որն Իգբալ Աբիլովին դատապարտեց 18 տարվա ազատազրկման՝ նրան մեղավոր ճանաչելով պետական դավաճանության և ատելության հրահրման մեջ։ Մեղադրանքների փաստական հիմքը կապված էր նրա մասնագիտական շփումների հետ հայ գիտնականների հետ, քանի որ պատմաբան և ազգագրագետ Աբիլովը հետազոտություններ էր անցկացնում թալիշ փոքրամասնության պատմության և մշակույթի վերաբերյալ»,- ասվում է հայտարարության մեջ։
Նշվում է, որ իրավունքը, որը երաշխավորում է հետազոտություններ անցկացնելու և գիտելիքներն ու ճշմարտությունն առանց սահմանափակման տարածելու ազատությունը, անկասկած, պաշտպանված է խոսքի ազատության իրավունքով։ Այն ժողովրդավարական հասարակությունների անկյունաքարն է, և հետազոտողները պետք է պաշտպանված լինեն ցանկացած անտեղի քաղաքական միջամտությունից։
«Ես կոչ եմ անում Ադրբեջանի իշխանություններին՝ անհապաղ վերանայել պարոն Աբիլովի դեմ մեղադրանքները և ազատ արձակել նրան, ինչպես նաև մյուս բոլոր անձանց, այդ թվում՝ մարդու իրավունքների պաշտպաններին, լրագրողներին և գիտնականներին, որոնք բանտարկված են խոսքի ազատության իրավունքն իրականացնելու համար»,- ընդգծել է ԵԽԽՎ զեկուցողը։
Հիշեցնենք, որ մայիսի 20-ին Լենքորանի ծանր հանցագործությունների դատարանում դատավոր Համմեդ Նուրիևի նախագահությամբ ընթացող դատական նիստում ընթերցվել էր դատավճիռը, որի համաձայն՝ Աբիլովը դատապարտվել է 18 տարվա ազատազրկման։
Թարգմանությունը՝ Էմմա Չոբանյանի
