Հայաստանի ու Թուրքիայի առաջին համատեղ կինոնախագիծը․ պոլսահայ հայտնի լուսանկարիչ Արա Գյուլերի մասին ֆիլմ կնկարահանվի

Հայաստանն ու Թուրքիան պոլսահայ հայտնի լուսանկարիչ Արա Գյուլերի կյանքի մասին համատեղ ֆիլմ կնկարահանեն, հայտնում են թուրքական լրատվամիջոցները։

Նշվում է, որ «Բարև» վերնագրով կենսագրական ֆիլմն առանձնանում է որպես երկու երկրների միջև շարունակվող դիվանագիտական ​​լարվածությունը հաղթահարելու առաջին համատեղ կինոնախագիծ։ Ասվում է, որ Կաննի կինոփառատոնի շրջանակում Marché du Film-ում ստորագրված համաձայնագիրը հզոր ուղերձ է այն մասին, որ մշակութային համագործակցությունը կարող է գերազանցել սահմաններն արվեստի միջոցով։

Ֆիլմի ռեժիսորներն են Էլա Ալյամաչը և Արեն Պերդեչին, որոնք նախկինում ուշադրություն են գրավել 1915 թվականի Հայոց ցեղասպանության մասին պատմող «Կորուսյալ թռչուններ» (2016) ֆիլմով։

Մշակութային համագործակցության մասին համաձայնագիրը Կաննում ստորագրել են թուրքական «Kara Kedi Film» ընկերությունը ներկայացնող Ալյամաչը և «Anso Films»-ը ներկայացնող հայ պրոդյուսեր Անի Գալստյանը։ Ռեժիսորները նշում են, որ ֆիլմի սցենարը համահեղինակել են Արա Գյուլերի հետ, որը մահացել է 2018 թվականին։

Հաղորդվում է, որ նախագծին  նաև աջակցում են Թուրքիայի մշակույթի և զբոսաշրջության նախարարությունը, Կինեմատոգրաֆիայի գլխավոր վարչությունը և թուրքական պետական TRT-ի 12 Punto հարթակը։ Ֆիլմի արտադրությանը մասնակցում են նաև Doğuş խմբի մաս կազմող Արա Գյուլերի արխիվային և հետազոտական ​​կենտրոնն ու Արա Գյուլերի թանգարանը։

Ռեժիսորների խոսքով՝ Արա Գյուլերի անձնական տեսախցիկների հատուկ օբյեկտիվները վերամշակվելու և Panavision-ի կողմից օգտագործվելու են նկարահանումների ընթացքում։ Ֆիլմի դերասանական կազմի և նկարահանումների ժամանակացույցի մասին առայժմ ոչինչ չի հաղորդվում։

Թարգմանությունը՝ Էմմա Չոբանյանի