Ո՛չ, չեմ զղջում. Տեր-Մարգարյանը՝ Չախոյանին ծեծելու մասին․ ՏԵՍԱՆՅՈՒԹ

Նոր Նորք վարչական շրջանի ղեկավար Տիգրան Տեր-Մարգարյանը, որն առավոտյան հայտնեց պաշտոնը թողնելու մասին, Factor TV-ի հարցին ի պատասխան՝ ասաց, որ չի զղջում բլոգեր, ակտիվիստ Արթուր Չախոյանին ծեծելու համար։

Հարցին՝ ինչո՞ւ է թաղապետարանում ծեծկռտուքից միայն 20 օր անց հրաժարական ներկայացնում, Տեր-Մարգարյանն արձագանքեց․ «Քաղաքական դաշտում իմ անելիքները որոշում եմ ես՝ երբ և որ ժամանակահատվածում»։

Արդյո՞ք «Հանրապետություն» խմբակցությունը կխզի ՔՊ-ի հետ կոալիցիոն հուշագիրը․ Նորքի պաշտոնաթող թաղապետի պատասխանը ոչ միանշանակ էր։

«Ես 2026-ին գնալու եմ ընտրությունների, հայտարարություն եմ արել, 2026-ին կհանդիպենք»,- ասաց Տիգրան Տեր-Մարգարյանը։

Հիշեցնենք՝ ապրիլի 30-ին Նոր Նորքի թաղապատերանում ծեծկռտուքից հետո մի խումբ անձանց կողմից ֆիզիկական ներգործության հատկանիշներով նախաձեռնված քրեական վարույթով Տեր-Մարգարյանը մեղադրյալ է։ Նրա նկատմամբ որպես խափանման միջոց է ընտրվել բացակայելու արգելքը։

Ընդգծենք նաև, որ «Հանրապետություն» կուսակցության անդամ, Մալաթիա-Սեբաստիա վարչական շրջանի ղեկավար Ռոմիկ Մխիթարյանը Hraparak.am-ի հետ զրույցում ասել էր, որ Տեր-Մարգարյանը չպետք է ազատվի պաշտոնից, բայց եթե Տիգրան Ավինյանն այդպիսի որոշում կայացնի, իրենք նույնպես կդադարեցնեն իրենց լիազորությունները։

2023 թվականի ավագանու ընտրություններին ՔՊ-ն, թեև հավաքել էր ամենաշատ քվեները, սակայն ոչ բավարար՝ միանձնյա իշխանություն ձևավորելու համար։ Ուստի, «Հանրապետություն» և «ՔՊ» խմբակցությունները կոալիցիոն հուշագիր կնքեցին և միասին ստանձնեցին քաղաքի կառավարումը։

Մանրամասները՝ տեսանյութում։

Արփի Հակոբյան