15.03.2026 | 13:39
Սպասվում է նաև բուք, ցածր հորիզոնական տեսանելիություն, ավտոճանապարհներին՝ մերկասառույց․ առաջիկա օրերի եղանակային կանխատեսումը
Քաղաքացիական հասարակության կրթությունը՝ Հայաստանի բուհերում. նոր համագործակցության հուշագրեր են ստորագրվել
Հասարակություն
16.05.2025 | 15:00
Հայաստանի յոթ ուսումնական հաստատություններում «Քաղաքացիական հասարակություն» ակադեմիական մոդուլ կներդրվի։ Սա են նախատեսում մայիսի 14-ին ստորագրված եռակողմ համագործակցության հուշագրերը։ Մոդուլը մշակվել է «ՀԿ Կենտրոն» քաղաքացիական հասարակության զարգացման ՀԿ-ի կողմից՝ Եվրամիության կողմից համաֆինանսավորվող «STRIVE» ծրագրի շրջանակում։
Հուշագրերը ստորագրվել են ՆԵՖ Բելգիա կազմակերպության, ՀԿ Կենտրոնի և Երևանի պետական, Հայաստանի ազգային ագրարային, Եվրասիա միջազգային, Գորիսի պետական համալսարանների, Վարդենիսի բժշկա-հումանիտար քոլեջ և Բերդի բազմագործառութային քոլեջների միջև։
Միջոցառման ժամանակ ունեցած ելույթում ԵՄ ծրագրերի ղեկավար Բրունո Մոնտարիոլը շեշտել է Եվրոպական միության հանձնառությունը Հայաստանում կրթության ոլորտի զարգացմանը։ Նա ընդգծել է՝ ԵՄ-ն խրախուսում է կրթական հաստատությունների մասնակցությունը նման ծրագրերին՝ ուղղված կրթական որակի և ոլորտային բարեփոխումների խթանմանը։
ՀԿ Կենտրոնի նախագահ Արփինե Հակոբյանի խոսքով՝ ստորագրված հուշագրերն արտահայտում են կրթական հաստատությունների պատրաստակամությունն ու տեսլականը՝ քաղաքացիական կրթությունն ընդգրկելու կրթական գործընթացում։
«Մենք հավատում ենք, որ սա կօգնի ձևավորել պատասխանատու, ներգրավված և ակտիվ քաղաքացիներ»,- հավելել է նա։
Նիյր Իսթ Ֆաունդեյշնի հայաստանյան մասնաճյուղի տնօրեն և «STRIVE» ծրագրի ղեկավար Արփինե Բաղդոյանն էլ իր խոսքում ընդգծել է. «Ձեր ուսումնական հաստատությունները հանդիսանում են այս բաղադրիչի երկարաժամկետ կայունությունն ապահովողներ։ Մենք լիահույս ենք, որ նոր հաստատություններ ևս կմիանան այս նախաձեռնությանը»։
Ներկայում նշված բուհերն ու քոլեջներն ուսումնական պլանների հաստատման փուլում են, և ակնկալվում է, որ 2025 թվականի սեպտեմբերից «Քաղաքացիական հասարակություն» մոդուլն արդեն կդասավանդվի ուսանողներին։
Նշենք, որ ավելի վաղ համագործակցության հուշագիր է կնքվել նաև Վանաձորի պետական համալսարանի հետ։
Ծրագրի շրջանակում մշակված կրթական մոդուլը նպատակ ունի բարձրացնել ուսանողների իրազեկվածությունը քաղաքացիական հասարակության դերի, գործառույթների և զարգացման ուղիների վերաբերյալ՝ նպաստելով քաղաքացիների քաղաքացիական գիտակցության և ներգրավվածության բարձրացմանը։
