16.07.2026 | 23:29
Հետաքննությունը պարզել է, որ Ալիևի թոռներն անօրինական կերպով օգտագործում են պաշտոնական լիմուզիններն և անվտանգության մեքենաները
Բաքվում պահվող լիբանանահայ գերի Վիգեն Էուլջեքչյանը 15 օրից ավելի հացադուլի մեջ է եղել
Քաղաքականություն
09.05.2025 | 17:34
Լիբանանահայ գերի Վիգեն Էուլջեքչյանը, որն ապօրինի ազատազրկման է դատարատվել Ադրբեջանի դատարանի կողմից ու պահվում է Բաքվում, ավելի քան 15 օր հացադուլի մեջ է եղել։ Այս մասին X-ի իր միկրոբլոգում հայտնել է Հայ որբերի օգնության ընկերության (SOAR) Բուենոս Այրեսի մասնաճյուղի տնօրեն Լուսիանա Մանուկյանը։
Նշվում է, որ Հայ որբերի օգնության ընկերության (SOAR) Բուենոս Այրեսի մասնաճյուղի նամակ է հղել Կարմիր Խաչի միջազգային կոմիտեին։
«2020 թվականից Ադրբեջանում պահվող հայ ռազմագերի Վիգեն Էյուլջեքչյանը լուռ, բայց խորապես ցավոտ բողոքի ակցիա է անցկացնում՝ հացադուլի միջոցով, որը տևում է ավելի քան 15 օր»,- նշել է Մանուկյանը՝ հավելելով, որ Վիգենի պահանջը մեկն է՝ նա հեռախոսազանգ է ցանկանում կնոջ՝ Լինդայի հետ։
Հիշեցնենք, որ 2021 թվականի հունիսի 14-ին Բաքվի դատարանը Վիգեն Էուլջեքչյանին դատապարտել է 20 տարվա ազատազրկման։ Ազատազրկման 5 տարին հայ ռազմագերին անցկացնելու է բանտում, մնացյալ մասը՝ խիստ ռեժիմի ուղղիչ հիմնարկում։ Բաքուն շինծու քրեական գործ էր հարուցել Էուլջեքչյանի նկատմամբ՝ նրան մեղադրելով վարձկանության մեջ։
Վիգեն Էուլջեքչյանը գերեվարվել էր 2020 թվականին՝ նոյեմբերի 9-ի հրադադարի մասին հայտարարությունից մեկ օր անց՝ Շուշիի մոտակայքում, մեկ այլ լիբանանահայ Մարալ Նաջարյանի հետ։ Նա մեկնել էր Լեռնային Ղարաբաղ՝ իրերը Շուշիի հյուրանոցից վերցնելու համար։ Նրանց կանգնեցրել էին ադրբեջանական զինվորները և ավտոբուսով տեղափոխել Բաքու՝ բազմաթիվ այլ հայ գերիների, քաղաքացիական անձանց և զինվորների հետ։ Մարալ Նաջարյանն ազատ է արձակվել 2021 թվականի մարտին։
Թարգմանությունը՝ Էմմա Չոբանյանի
