18.07.2026 | 11:55
Արտարժույթների փոխարժեքները՝ հուլիսի 18-ի դրությամբ
ԿԳՄՍՆ-ն Պուշկինի անվան դպրոցի ծնողներին և ուսուցիչներին կոչ է անում զերծ մնալ ուսումնական գործընթացը խաթարելու փորձերից
Հասարակություն
08.05.2025 | 19:13
«Երևանի Ա․ Պուշկինի անվան թիվ 8 հիմնական դպրոցի նախկին տնօրենի պաշտոնավորման ժամկետը լրացել է դեռևս 2024 թվականի մարտի 29-ին»,- Factor TV-ին հայտնեցին ԿԳՄՍ նախարարությունից՝ արձագանքելով դպրոցում այսօր առավոտից կազմակերպված ստորագրահավաքին և դասադուլին։
Հիշեցնենք՝ ծնողներն ու աշակերտները դեմ են դպրոցի տնօրեն Նատալյա Ստեփանյանի՝ աշխատանքից հեռացմանը:
«Պուշկինի անվան թիվ 8 հիմնական դպրոցի տնօրենի թափուր պաշտոնի համար հայտարարված մրցույթի հարցազրույցի փուլին մասնակցել է նաև նախկին տնօրենը։ Վերջինը, արդեն երկրորդ անգամ չհաղթահարելով հարցազրույցի փուլը, բողաքարկել է դրա արդյունքները։ Այժմ ընթանում է բողոքարկման գործընթաց՝ համաձայն ՀՀ կառավարության 2023 թ․ թիվ 181-Ն որոշման»,-նշվում է նախարարության պատասխանում։
Թե ինչու է տնօրենը հեռացվել աշխատանքից և ինչ հիմքով, ստորագրահավաքի մասնակիցները նշել էին՝ չգիտեն։ Նրանք պահանջում են, որ Երևանի քաղաքապետարանից և ԿԳՄՍ նախարարությունից ներկայացուցիչներ գնան դպրոց:
«Միաժամանակ տեղեկացնում ենք, որ Երևանի Ա․ Պուշկինի անվան թիվ 8 հիմնական դպրոցի տնօրենի պաշտոնում նոր նշանակում չի կատարվել. տնօրենի պարտականությունների կատարումն իրականացվում է՝ ըստ սահմանված կարգի։
Դպրոցի ծնողական և մանկավարժական համայնքի ներկայացուցիչներին կոչ ենք անում զերծ մնալ ուսումնական գործընթացը խաթարելու փորձերից։
Դպրոցի տնօրենի թափուր տեղի համալրումը կիրականացվի օրենքով սահմանված կարգով»,-նշված է ԿԳՄՍ նախարարության պատասխանում։
Աննա Բաբաջանյան
