27.06.2026 | 14:14
Կարելի է քայլուղի բացել. Փաշինյանը ծանոթացել է Կիևյան կամրջի շինաշխատանքներին․ ՏԵՍԱՆՅՈՒԹ
Դատավոր Մասիս Մելքոնյանի նկատմամբ կարգապահական վարույթ է հարուցվել
Հասարակություն
08.05.2025 | 16:07
Երևանի քրեական դատարանի դատավոր Մասիս Մելքոնյանի նկատմամբ կարգապահական վարույթ է հարուցվել։ Ըստ գործի՝ դատավորը իր վարույթում քննվող գործերից մեկով ցուցմունք տալուց առաջ մեղադրյալին չի պարզաբանել իրավունքները։
Թե ով է մեղադրյալը և ով է դատավորի նկատմամբ կարգապահական վարույթ հարուցելու հարց բարձրացրել, մեզ հայտնի չէ։
Դատավոր Մելքոնյանը Factor TV-ի հետ զրույցում հաստատեց, որ իր վերաբերյալ վարույթ է առկա, սակայն նշեց, որ ինքը չի ստացել նյութերը։ Մեր ճշտող հարցին՝ դատավորը վարույթի շրջանակներում բացատրություն չի՞ ներկայացրել, Մելքոնյանը պատասխանեց, որ ներկայացրել և պարզաբանել է իրավիճակը, բայց որպես դատավոր իրավունք չունի ընթացիկ վարույթի վերաբերյալ պարզաբանումներ ներկայացնել։
Նշենք, որ Factor TV-ի տեղեկություններով՝ գործն արդեն ուղարկվել է ԲԴԽ։
Հիշեցնենք, որ դատավոր Մասիս Մելքոնյանը Հանրապետություն կուսակցության անդամ է եղել։ Նա դատավոր է դարձել իրավունքի ուժով, այսինքն՝ նախագահը չի ստորագրել նրան դատավոր նշանակելու հրամանագիրը։ Մելքոնյանը հայտնի է մի շարք քաղաքական հնչերանգ ունեցող գործերով կալանքի իր որոշումներով։ Մասնավորապես՝ Մելքոնյանի որոշմամբ՝ տարբեր ժամանակահատվածներում կալանավորվել են ԱԺ ընդդիմադիր պատգամավոր Լևոն Քոչարյանը, ՀՅԴ անդամ Վահե Դանիելյանը, Հայաստանի ազգային հերոս Տիրան Խաչատրյանը։ Մելքոնյանի վարույթում քննվել է նաև 44-օրյա պատերազմում զոհված Մխիթար Գալեյանի հոր՝ Գարիկ Գալեյանի գործը։
Արաքս Մամուլան
