Հասարակություն
08.05.2025 | 15:05
«Հայաստան» խմբակցության պատգամավոր, ՀՅԴ անդամ Արմինե Խերանյանը 2024 թվականին բնակարան է գնել Երևանի Շենգավիթ վարչական շրջանում, 2000 թվականից առանձնատուն ունի Արարատի Այնթափ համայնքում։
Պատգամավորը Կոռուպցիայի կանխարգելման հանձնաժողով է ներկայացրել պաշտոնը ստանձնելու օրվա դրությամբ գույքի և եկամուտների հայտարարագիր։ Խերանյանը, հիշեցնենք, մանդատը ստացել է 2025-ի հունվարի 20-ին՝ պատգամավոր Մհեր Սահակյանի հանկարծամահությունից հետո։
Ըստ այդմ՝ 2025 հունվարի 20-ի դրությամբ նա ստացել է 488 հազար դրամ եկամուտ, որից 72 հազար դրամ աշխատավարձ՝ «Վ. Բրյուսովի անվան պետական համալսարան» հիմնադրամից, 224 հազար դրամ՝ «Քվանտ» վարժարանից, 191 հազար դրամ աշխատավարձ՝ ԱԺ-ից։
Խերանյանը հայտարարագրել է 17 մլն դրամ բանկային ավանդներ, բանկային 2 հաշվի մնացորդը եղել է 400 հազար դրամ, կանխիկ ունեցել է 2 մլն դրամ։ Պատգամավորն ունի 3 վարկ ՝ ընդհանուր 1․6 մլն դրամ ծավալով։
Ուշագրավ է, որ Խերանյանը հայտարարագրում իր ընտանիքի անդամների, մասնավորապես՝ ծնողների մասին որևէ նշում չի արել, թեև գրանցված է նրանց հետ նույն հասցեում։
Գայանե Խաչատրյան
