ՀՀ-ն միանում է միջազգային տրանսպորտային և տարանցիկ միջանցքի ստեղծմանը

Հայաստանի կառավարությունը այսօր կողմ քվեարկեց Աշգաբաթի Համաձայնագրին միանալուն։ Այն ենթադրում է միջազգային տրանսպորտային և տարանցիկ միջանցքի ստեղծում Իրանի Իսլամական Հանրապետության, Օմանի Սուլթանության, Կատարի Պետության, Թուրքմենստանի և Ուզբեկստանի Հանրապետության միջև։

Որոշման հիմնավորման մեջ նշվում է, որ այս համաձայնագրին միանալը կստեղծի նոր հնարավորություններ Կենտրոնական Ասիայի երկրների և Պարսից ծոցի ու Օման ծովի նավահանգիստների միջև տրանսպորտային միջանցքում իտեգրման և անդամ պետությունների տրանսպորտային և տարանցիկ պոտենցյալից օգտվելու համար։

«Աշգաբաթի Համաձայնագրին միանալը կնպաստի անդամ պետությունների տարածքով բեռների և ուղևորների փոխադրման ու տարանցման հուսալի պայմանների ստեղծմանը, մուլտիմոդալ փոխադրումների դյուրացմանը, տրանսպորտային ծախսերի օպտիմալացմանը, հանրապետության տարանցիկ դերի բարձրացմանը, տրանսպորտային փոխադրումների անվտանգության բարձրացմանը, անդամ պետությունների փոխադրող կազմակերպությունների համար հավասար պայմանների ստեղծմանը, մաքսային ընթացակարգերի դյուրացմանը»‎,- ասված է որոշման մեջ։

Նշվում է, որ համաձայնագիրը համահունչ է նաև «Խաղաղության խաչմերուկ» նախագծի հիմնական սկզբունքներին և կնպաստի տարածաշրջանում տրանսպորտային կապերի և տնտեսական համագործակցության խորացմանը։

Կառավարությունը որոշումն ուղարկելու է ՀՀ Սահմանադրական դատարան՝ որոշման նախագծի համապատասխանությունը Սահմանադրությանը պարզելու նպատակով, իսկ դրական եզրակացություն ստանալուց հետո՝ Ազգային ժողով։