07.12.2025 | 18:30
Իրավիճակը՝ 18:10-ի դրությամբ․ հանրապետության որոշ հատվածներում ձյուն է տեղում, որոշներում՝ ձնախառն անձրև
Բելառուսում անօրինական կալանավորված ԱՄՆ քաղաքացի Զենկովիչն ազատ է արձակվել
Քաղաքականություն
01.05.2025 | 12:59
ԱՄՆ պետքարտուղար Մարկո Ռուբիոն X սոցիալական ցանցում գրառմամբ հայտնել է, որ Բելառուսն ազատ է արձակել անօրինական կերպով ձերբակալված ևս մեկ ԱՄՆ քաղաքացու։ Խոսքը բելառուս ընդդիմադիր ակտիվիստ, Բելառուսի և ԱՄՆ քաղաքացի Յուրի Զենկովիչի մասին է, փոխանցում է Current time-ը։
«Ոչ մի նախագահ այդքան շատ բան, այդքան արագ չի արել՝ ամերիկացիների անվտանգությունն արտասահմանում պահպանելու համար»,- գրել է Ռուբիոն։
Բելառուսում Զենկովիչը դատապարտվել էր 11 տարվա ազատազրկման, այսպես կոչված, «դավադրության գործով»։ Բելառուսի Ժողովրդական ճակատ կուսակցության առաջնորդ Գրիգորի Կաստուսևը և քաղաքագետ Ալեքսանդր Ֆեդուտան նույնպես դատապարտվել էին այդ հոդվածով։ Կաստուսևն ազատ էր արձակվել 2024 թվականի հուլիսին՝ համաներման արդյունքում (նա քաղցկեղ ունի): Ֆեդուտան, որը նույնպես տառապում է մի քանի քրոնիկ հիվանդություններից, մնում է ճաղերի հետևում։
«Ես գիտեի, որ այս օրը կգա։ Անցել է 1480 օր, բայց նա ողջ է մնացել և արդեն տուն է վերադառնում, ինձ մոտ՝ Ամերիկա»,- Զենկովիչի կնոջ՝ Ալյոնա Դենիսովեցի խոսքերն է մեջբերել «Ազատություն» ռադիոկայանի բելառուսական ծառայությունը։
Վերջին անգամ Յուրի Զենկովիչի մասին լուրեր հայտնվել էին 2025 թվականի սկզբին. հունվարի 17-ին նրան ցուցադրել էին Բելառուսի պետական հեռուստատեսությամբ։ Կադրերում երևում էր, թե որքան է նիհարել քաղբանտարկյալը։
Զենկովիչը բելառուս քաղաքական գործիչ և ամերիկացի փաստաբան է։ Նա և «դավադրության գործով» անցնող մյուս մեղադրյալները ձերբակալվել էին 2021 թվականի ապրիլին։ Բելառուսի իշխանությունների տվյալներով՝ նրանք մահափորձ էին նախապատրաստում Ալեքսանդր Լուկաշենկոյի և նրա որդիների դեմ, ինչպես նաև ծրագրում էին պետական հեղաշրջում իրականացնել։
Զենկովիչը մեղադրյալներից միակն էր, որն ընդունել էր մեղքը և չէր հերքել մեղադրանքը, որ դավադրության կազմակերպիչն է։ Նա նաև ներողություն էր խնդրել մյուս մեղադրյալներից։
Արդյունքում, Զենկովիչը դատապարտվել էր 11 տարվա ազատազրկման՝ խիստ ռեժիմի գաղութում, Ֆեդուտան և Կաստուսևը՝ 10 տարվա։ Արդեն բանտում գտնվող Յուրի Զենկովիչի դեմ նախ քրեական գործ էր հարուցվել «կառավարության պաշտոնյային վիրավորելու» համար և նրա ազատազրկման ժամկետին ավելացվել վեց ամիս, ևս մեկ գործ էլ՝ գաղութի «վարչակազմին չենթարկվելու» համար, որի համար նա դատապարտվել էր ևս երկու տարվա ազատազրկման։
Թարգմանությունը՝ Էմմա Չոբանյանի
