Բաքվում շինծու գործերով դատական նիստում Արկադի Ղուկասյանը հերքել է իր մասին «տուժողներից» մեկի հայտարարությունը

Բաքվի զինվորական դատարանում այսօր տեղի է ունեցել Արցախի ղեկավարների ու այլ պաշտոնյաների շինծու գործերով հերթական դատական նիստը՝ դատավոր Զեյնալ Աղաևի նախագահությամբ։ Ադրբեջանական լրատվամիջոցների հաղորդմամբ՝ դատավարությունը շարունակվել է «տուժողների» ցուցմունքներով։

Մասնավորապես, «տուժողներից» Աղալար Ալիևը, ըստ ադրբեջանական լրատվամիջոցների, ասել է, որ ծնվել է Շուշիում։ Նա ասել է, թե Արցախի հայերը «քարկոծել են Շուշիից դուրս եկող բոլոր տրանսպորտային միջոցները, այդ թվում՝ ավտոբուսները, ավելի ուշ սկսել ծանր զենքերով հրետակոծել բնակելի թաղամասերը։ Իսկ 1991 թվականի նոյեմբերի 20-ին ուղղաթիռ է խփվել, իսկ այդ առավոտյան տեղի է ունեցել իր հարսանիքը»։ «Տուժողը» նաև ասել է, թե ճանաչում է Արցախի նախկին նախագահ Արկադի Ղուկասյանին, որ նա «Խորհրդային Ղարաբաղ» թերթի խմբագիրն էր։ Ալիևը հայտարարել է, իբր, «թերթը կոչ է արել վտարել ադրբեջանցիներին իրենց հողերից»։

Մեկնաբանելով այս հայտարարությունները՝ Արկադի Ղուկասյանն ասել է, որ 1992 թվականին «Խորհրդային Ղարաբաղ» թերթը այլևս չէր հրատարակվում, որ ինքն աշխատել է որպես խմբագրի տեղակալ և չի ճանաչում, այսպես կոչված, «տուժողին»։

«Տուժող» Օրդուխան Քերիմովը նույնպես իր ցուցմունքում նշել է, որ ճանաչում է Արկադի Ղուկասյանին։ Նա ասել է, թե «1991 թվականի ամռանը Սիրխավանդ գյուղում հայերը ողջ-ողջ այրել են չորս ադրբեջանցիների»։

Հաջորդ դատական ​​նիստը նշանակվել է ապրիլի 28-ին։

Թարգմանությունը՝ Էմմա Չոբանյանի