Իրակլի Ղարիբաշվիլին թողնում է «Վրացական երազանք» կուսակցության նախագահի պաշտոնը և հեռանում քաղաքականությունից

Վրաստանի նախկին վարչապետ Իրակլի Ղարիբաշվիլին լքում է իշխող «Վրացական երազանք» կուսակցության նախագահի պաշտոնը և հեռանում քաղաքականությունից։ Այս մասին նա հայտարարել է հատուկ ճեպազրույցի ժամանակ։

«Այն պատվավոր առաքելությունը, որը վստահվել էր ինձ քաղաքականություն վերադառնալիս, նախ՝ նշանակվելով պաշտպանության նախարար, ապա երկրորդ անգամ՝ վարչապետ և վերջապես կուսակցության նախագահ, կարծում եմ՝ կատարել եմ։ Հիմա այլևս անհրաժեշտություն չեմ տեսնում մնալու կուսակցության նախագահի պաշտոնում և ընդհանրապես քաղաքականության մեջ, ուստի որոշել եմ թողնել «Վրացական երազանքի» նախագահի պաշտոնը և հեռանալ քաղաքականությունից։ Ես կշարունակեմ ծառայել իմ երկրին այլ պաշտոնից»,- Ղարիբաշվիլիի խոսքերն է մեջբերում է Эхо Кавказа-ն։

Նա նաև շնորհակալություն է հայտնել «Վրացական երազանքի» հիմնադիր, կուսակցության փաստացի առաջնորդ Բիձինա Իվանիշվիլիին՝ իրեն «երկրի ամենաբարձր քաղաքական պաշտոնները զբաղեցնելու միջոցով Վրաստանին ծառայելու եզակի հնարավորություն» տալու համար։

Ղարիբաշվիլին «Վրացական երազանք»-ի գործունեությանը մասնակցել է 2012 թվականից՝ դրա հիմնադրումից ի վեր, երկու անգամ զբաղեցրել է վարչապետի և կուսակցության նախագահի պաշտոնները։ Նա նշել է, որ զբաղվելու է մասնավոր ձեռներեցությամբ՝ խոստանալով մանրամասները ներկայացնել ավելի ուշ։ Ղարիբաշվիլին նաև չի ասել, թե ով կզբաղեցնի իր տեղը «Վրացական երազանքի» նախագահի պաշտոնում։

Իրակլի Ղարիբաշվիլին բացառել է քաղաքականություն վերադառնալու հնարավորությունը «Վրացական երազանք»-ին  ընդդիմադիր որևէ քաղաքական ուժի կազմում։

2012-2013 թվականներին Իրակլի Ղարիբաշվիլին Վրաստանի հասարակական կարգի նախարարն է եղել, 2013-2015 թվականներին առաջին անգամ գլխավորել է երկրի կառավարությունը, 2019-2021 թվականներին եղել է պաշտպանության նախարար, իսկ 2021-2024 թվականներին՝ երկրորդ անգամ զբաղեցրել վարչապետի պաշտոնը։

Թարգմանությունը՝ Էմմա Չոբանյանի