Ադրբեջանի ՊՆ-ն արձագանքել է Խոզնավարը գնդակոծելու՝ ՀՀ ՊՆ հայտարարությանը

Ադրբեջանի ՊՆ-ն արձագանքել  է ՀՀ ՊՆ հայտարարությանը Սյունիքի մարզի Խոզնավար բնակավայրի ուղղությամբ կրակ բացելու վերաբերյալ։

Բաքուն հայտարարել է, թե ՀՀ պաշտպանության նախարարության կողմից տարածված տեղեկատվությունը, թե ապրիլի 23-ին, ժամը 22:20-ի սահմաններում, ադրբեջանական բանակի ստորաբաժանումները կրակ են բացել Խոզնավար բնակավայրի ուղղությամբ, «ևս մեկ ապատեղեկատվություն է և չի համապատասխանում իրականությանը»։

«Մենք ևս մեկ անգամ հայտարարում ենք, որ ադրբեջանական բանակի ստորաբաժանումները երբեք կրակ չեն բացում քաղաքացիական անձանց և օբյեկտների վրա։ Հակառակ կողմը փորձում է թաքցնել իր սադրանքները՝ տարածելով միտումնավոր ապատեղեկատվություն և կեղծ տեղեկատվություն, ինչպես նաև ձևավորելով կեղծ կարծիք միջազգային հանրության մոտ», – ասվում է հայտարարության մեջ»,- նշում է Ադրբեջանի ՊՆ-ն՝ առանց ապացույցներ ներկայացնելու։Ի տարբերություն ադրբեջանական կողմի՝ ՀՀ ՊՆ-ն  Ադրբեջանի ԶՈՒ-ի կողմից Խոզնավարի բնակելի տան գնդակոծման լուսանկարներ էր հրապարակել։

Հիշեցնենք, որ ՀՀ ՊՆ-ն հայտարարել էր, որ ապրիլի 23-ին՝ ժամը 22:20-ի սահմաններում, Ադրբեջանի ԶՈՒ ստորաբաժանումները կրակ են բացել Սյունիքի մարզի Խոզնավար բնակավայրի ուղղությամբ, ինչի հետևանքով վնասվել է բնակելի տուն։

«Ադրբեջանական կողմին կոչ ենք անում հետաքննել Խոզնավարի բնակելի տան գնդակոծման փաստը և հանդես գալ հրապարակային պարզաբանումներով»,- ասված էր ՊՆ-ի տարածած հաղորդագրության մեջ։

Վերջին շրջանում ադրբեջանական կողմի կրակոցները Խոզնավարի ուղղությամբ պարբերական բնույթ են կրում։  Դրանց անդրադարձել էր նաև ՀՀ-ում Եմ դիտորդական առաքելությունը։

«Խոզնավարում EUMA-ն նկատել է երկու կրակոցների հետևանքները, որոնք վնասել են քաղաքացիական ենթակառուցվածքները, հնարավոր է՝ դրանք արձակվել են տարածքում գտնվող Ադրբեջանի  դիրքից»,- արձանագրել էր առաքելությունը ապրիլի 22-ին տարածած հայտարարության մեջ։

Էմմա Չոբանյանի