«Դիմելու ենք ՔԿ, ԱԱԾ և գլխավոր դատախազին, որ մեզ ընդունեն». թալանի վերադարձի պահանջով ակցիա իրականացնող արցախցիները հանդիպեցին Շահրամանյանի հետ

Ապրիլի 18-ին ՀՀ-ում Արցախի ներկայացուցչության շենքի դիմաց ակցիա իրականացնող մի խումբ արցախցիներ հանդիպել են Արցախի հանրապետության վերջին նախագահ Սամվել Շահրամանյանի և պետնախարարի հետ։ Դեռևս օրեր առաջ ակցիայի մասնակիցները Շահրամանյանից պահանջում էին քայլեր ձեռնարկել, որ վերադարձվի Արցախում՝ ըստ իրենց պնդման, 48 ընտանիքի կողմից թալանված 467 մլն դոլարը.

«Ամբողջ թալանը չենք կարող իմանալ, որովհետև մենք լիազորված չենք, բայց մենք ահռելի մի մասը տեսել ենք փաստաթղթերում, որը ներկայացված է Դատախազություն։ Որոշ դրվագներում քրեական վարույթ կա նախաձեռնված, որոշ դրվագներ դեռ նախաքննության փուլում են։ Մենք գիտենք, որ հիմնական գումարները գնացել են կոնկրետ ուժերի ներկայացուցիչներին, որոնք նաև Սամվել Շահրամանյանին բերել են դրել նախագահ»,- ասում էին նրանք։

Շահրամանյանն, ի վերջո, հանդիպել էր նրանց՝ խոստանալով առաջիկայում ավելի երկար քննարկում ունենալ։ Արդեն այսօր, փաստացի, հանդիպումը կայացել է.

«Երկար քննարկում ունեցանք նախագահի և պետնախարարի հետ, պայմանավորվածություն ենք ձեռք բերել, որ մոտակա օրերին իրենք նամակով դիմեն Գլխավոր դատախազին, Քննչական կոմիտեի նախագահին, ԱԱԾ տնօրենին, որ ընդունելություն կազմակերպեն։ Որ կառույցը մեզ ընդունի՝ կներկայացնենք բոլոր խնդիրները, թալանը, որտեղից ով՝ ինչ ինֆորմացիայի է տիրապետում, ընդհանուր մի «պապկա» ենք ներկայացնելու»,- լրագրողների հետ զրույցում ասաց ակցիայի մասնակից Նահապետ Սարգսյանը։

Հարցին՝ հնարավո՞ր է այդպես էլ որևէ կառույց չընդունի, Սարգսյանը բացասական պատասխան տվեց.

«Չենք պատկերացնում, որ չեն ընդունի։ Հայաստանի կառավարությունն ամեն օր խոսում է կոռուպցիայի մասին, ասում է՝ դեմ ենք կոռուպցիային։ Վճռական քայլ է, որ նախագահի հետ գնալու ենք»։

Սարգսյանի փոխանցմամբ՝ արդեն ընդունելիությունից հետո պարզ կլինի, թե ինչ քայլեր կձեռնարկեն հետագայում։