Քաղաքականություն
21.04.2025 | 17:16
Մոսկվայի Բուտիրսկի շրջանային դատարանը Միխայիլ Խաչատուրյանին մեղավոր է ճանաչել սեփական դուստրերի նկատմամբ բռնության գործով, գրում է Meduza-ն։
Հաղորդվում է, որ դատարանը դադարեցրել է քրեական հետապնդումը՝ մեղադրյալի մահվան պատճառով։
«Մեղադրյալի նկատմամբ քրեական հետապնդումը դադարեցվում է ոչ վերականգնողական հիմքերով»,- ասվում է որոշման մեջ։
Որոշման հրապարակման ժամանակ Խաչատուրյանի երկու դուստրերը դատարանի դահլիճում են եղել։
Հավելենք, որ Մարիա, Անգելինա և Քրիստինա Խաչատուրյանները ձերբակալվել էին 2018 թվականի հուլիսին Մոսկվայում՝ իրենց 57-ամյա հոր՝ Միխայիլ Խաչատուրյանի սպանության մեղադրանքով։ Ձերբակալման պահին նրանք 17, 18 և 19 տարեկան էին։ Աղջիկները խոստովանական ցուցմունք էին տվել ու պատմել, որ հայրը տարիներ շարունակ բռնություն է գործադրել նրանց նկատմամբ, այդ թվում՝ սեռական։ Նրանց մեղադրանք էր առաջադրվել նախնական համաձայնությամբ կատարված սպանության համար։ Պաշտպանական կողմը պնդում է, որ նրանք գործել են ինքնապաշտպանության նպատակով։ Քույրերի դեմ գործերը հասել էին դատարան, բայց հետո վերադարձվել դատախազություն։
Միխայիլ Խաչատուրյանի դեմ քրեական գործ էր հարուցվել 2021 թվականին։ Նա մեղադրվում էր սեռական ոտնձգության և խոշտանգումների մեջ։ Ավելի ուշ հետաքննությունը խստացրել էր Խաչատուրյանի գործով մեղադրանքը՝ ավելացնելով սեփական դուստրերի առողջությանը ծանր վնաս հասցնելու և նրանց ընկերուհուն ուղարկված պոռնոգրաֆիկ նյութեր տարածելու մեղադրանքները։ Խաչատուրյան քույրերը, ինչպես նաև նրանց ընկերուհին, այս գործով ճանաչվել են տուժողներ։
Թարգմանությունը՝ Էմմա Չոբանյանի
