29.04.2026 | 23:40
Հայաստան–ՄԱԿ համագործակցություն․ ուշադրության կենտրոնում՝ խոցելի խմբերի պաշտպանությունը
ԲԴԽ նախագահ Արթուր Աթաբեկյանն ընդունել է ԵԽ ներկայացուցիչներ Լիլիթ Դանեղյանին և Արման Զրվանդյանին
Հասարակություն
18.04.2025 | 17:50
Բարձրագույն դատական խորհրդի նախագահ Արթուր Աթաբեկյանն ընդունել է Եվրոպայի խորհրդի մարդու իրավունքների, արդարադատության և իրավական համագործակցության չափանիշների իրականացման վարչության իրավական բարեփոխումների և մարդու իրավունքների հարցերով համագործակցության ծրագրերի բաժնի փոխտնօրեն Լիլիթ Դանեղյանին ու Երևանում ԵԽ գրասենյակի «Աջակցություն դատաիրավական բարեփոխումների իրականացմանը Հայաստանում» ծրագրի ղեկավար Արման Զրվանդյանին․ տեղեկացնում են ԲԴԽ-ից։
Ողջունելով հյուրերին՝ Արթուր Աթաբեկյանը բարձր է գնահատել Եվրոպայի խորհրդի հետ փոխգործակցությունը: Նա կարևորել է Եխ-ի դերն ու աջակցությունը հատկապես դատարանների բեռնաթափման ուղղությամբ իրականացվող բարեփոխումներում՝ մատնանշելով քաղաքացիական դատավարությունում արձանագրած բեռնաթափումը, ինչը զգալի կրճատել է գործերի քննության ժամկետները։ Արթուր Աթաբեկյանը գործընկերներին ներկայացրել է դատական համակարգում դեռևս առկա խնդիրների ուղղությամբ իրականացվող քայլերը՝ մասնավորեցնելով, առաջիկայում Վերաքննիչ քրեական և Վերաքննիչ վարչական ատյաններերում նախատեսվող գործերի քննության գրավոր ընթացակարգի ներդրման անհրաժեշտությունը:
Քննարկվել են քրեական գործերի քննության ժամկետներն արագացնող գործիքակազմի ներդրման հեռանկարները: Բարձրագույն դատական խորհրդի նախագահն անդրադարձել է Եվրոպայի խորհրդի Վենետիկի հանձնաժողովի և Կոռուպցիայի դեմ պայքարի պետությունների խմբի (GRECO) առաջարկություններին՝ նշելով, որ ներկայում արդյունավետ համագործակցություն է առկա «Աջակցություն դատաիրավական բարեփոխումների իրականացմանը Հայաստանում» ծրագրի շրջանակում, մասնավորապես՝ Բարձրագույն դատական խորհրդի կողմից ցուցաբերված աջակցությամբ՝ առանձին որոշումները բողոքարկելու նոր ընթացակարգերի մշակման ուղղությամբ։
Հանդիպմանը կարևորվել է դատավորների գնահատման համակարգի բարելավումը և դրա շրջանակում գործող ԲԴԽ-ի կողմից հաստատված գնահատման նոր մեթոդաբանական կարգը։
Անդրադարձ է եղել նաև դատարաններում վարչարարության, գործավարության կարգի կատարելագործման խնդիրներին:
Հանդիպման ավարտին գործընկերները վերահաստատել են արդարադատության իրականացմանը նպաստող ջանքերի մեկտեղման անհրաժեշտությունն ու համատեղ օրակարգերի իրագործման շարունակականությունը:
