Բաքվում առաջարկվել է քրեական գործ հարուցել, իբր, «հայկական զինված ուժերի կողմից Խոջալուի օկուպացիայի և ադրբեջանցիների նկատմամբ իրականացված ցեղասպանության» վերաբերյալ

Բաքվի զինվորական դատարանում այսօր տեղի է ունեցել Արցախի ղեկավարների և այլ պաշտոնյաների շինծու գործերով հերթական դատական նիստը։ Ադրբեջանական լրատվամիջոցների հաղորդմամբ՝ դատավոր Զեյնալ Աղաևը «տուժողներին», ովքեր առաջին անգամ են մասնակցել գործընթացին, բացատրել է օրենքով նախատեսված նրանց իրավունքներն ու պարտականությունները։

Սկզբում Արցախի նախկին նախագահ Արկադի Ղուկասյանն է հարցաքննվել նախորդ դատական ​​նիստում ուսումնասիրված փաստաթղթերի հիման վրա։

Այնուհետև Ադրբեջանի Գլխավոր դատախազության պետական ​​մեղադրանքների վարչության պետ Նասիր Բայրամովն առաջարկել է քրեական գործ հարուցել, իբր, «հայկական զինված ուժերի կողմից ադրբեջանական Խոջալու քաղաքի օկուպացիայի և ադրբեջանցիների նկատմամբ իրականացված ցեղասպանության փաստի վերաբերյալ հավաքված ապացույցներն ուսումնասիրելու, ինչպես նաև զոհերին հարցաքննելու համար» ։

Ներկայացվել են, իբր, «Խոջալուի ցեղասպանությունից առաջ տարածաշրջանում հայերի կողմից ադրբեջանցիների նկատմամբ կատարված հանցագործությունների վերաբերյալ հավաքված փաստաթղթեր, ապացույցներ և լուսանկարներ»։ Ավելի ուշ ուսումնասիրվել են, իբր, «Մեշալիի ցեղասպանությանը վերաբերող փաստաթղթերը»։

Նշենք, որ հայ գերիներից Վագիֆ Խաչատրյանը 2023 թվականի նոյեմբերի 7-ին Բաքվի ռազմական դատարանի կողմից այս «դեպքով» շինծու գործերով դատապարտվեցծլ է 15 տարվա ազատազրկման։

Հաջորդ դատական նիստը նշանակվել է ապրիլի 18-ին։

Թարգմանությունը՝ Էմմա Չոբանյանի