ԱՄՆ Պետքարտուղարությունը կասեցրել է Հայաստանին հատկացվող մի քանի դրամաշնորհները

ԱՄՆ Պետքարտուղարությունը չեղարկել է Հայաստանում «Ժողովրդավարական մշակույթի խթանման» համար ծրագրի ֆինանսավորումը, որի կազմում էր 2 մլն դոլար։ Այս մասին X-ի միկրոբլոգում հայտնել է Իլոն Մասկի ղեկավարած ԱՄՆ կառավարության արդյունավետության դեպարտամենտը՝ DOGE-ը։

«Չեղյալ են հայտարարվել հետևյալ անօգուտ դրամաշնորհները՝ 1,4 միլիոն դոլար՝ Բրազիլիայում «Ինտերնետի հատվածավորումը կանխարգելելու համար», 750 հազար դոլար՝ Ղրղզստանում «Քաղաքացիական հասարակության կայունության և ադապտացիան ապահովելու» համար, 1 միլիոն դոլար՝ Շրի Լանկայում «Վստահության ամրապնդման և հույսի պահպանման» համար, 2 միլիոն դոլար՝ Հայաստանում «Ժողովրդավարական մշակույթի խթանման» համար»,- ասվում է գրառման մեջ։

Մեկ այլ գրառմամբ էլ նշվում է, որ «պետքարտուղար Մարկո Ռուբիոն շարունակում է մանրակրկիտ ուսումնասիրել արտաքին օգնությունը՝ չեղարկելով 215 միլիոն դոլարի 139 անօգուտ դրամաշնորհներ»։ Չեղարկվել են  դրամաշնորհներ Մեծ Բրիտանիայում, Ուզբեկստանում, Մոլդովայում, Բրազիլիայում, Բելառուսում, Բուլղարիայում, Մավրիտանիայում, Լիբանանում ու Թունիսում մի շարք ծրագրերի համար։

Washington Free Beacon-ն էլ գրում է, որ Պետդեպարտամենտը չեղարկել է 214 միլիոն դոլարի արտաքին ֆինանսական նախաձեռնություններ՝ վերացնելով հարկ վճարողների կողմից ֆինանսավորվող 139 դրամաշնորհներ, որոնք, ի թիվս այլնի, աջակցում էին Մոլդովայում «լրատվական կենտրոնների կայունությանը», Միացյալ Թագավորությունում«մեդիա բազմազանությանը» և Հայաստանում «շրջակա միջավայրի դիմակայունությանը»։

Լրատվամիջոցի կողմից ձեռք բերված Պետդեպարտամենտի ներքին փաստաթուղթը ցույց է տալիս, որ DOGE-ը «մնացած արտասահմանյան օգնության դրամաշնորհային ծրագրերի լրացուցիչ վերանայում» է իրականացրել այն բանից հետո, երբ Պետդեպարտամենտն ավարտել է իր արտասահմանյան ֆինանսավորման նախնական վերանայումը փետրվարի վերջին։

«Կրճատված դրամաշնորհների թվում են 14.6 միլիոն դոլարի ծրագիրը, որն աջակցել է Մոլդովայում «լրատվական խմբագրությունների կայունության և ներգրավվածության ընդլայնմանը», 5.2 միլիոն դոլարի «մեդիա բազմազանության» դրամաշնորհը, որը ֆինանսավորել է «Միացյալ Թագավորությունում ապատեղեկատվության դեմ պայքարի ծրագիրը», 400,000 դոլարի «Շրջակա միջավայրի դիմակայունության կառուցման» դրամաշնորհը Հայաստանում, 1 միլիոն դոլարի դրամաշնորհը «աշխատանքային գրաֆիկով աշխատողների իրավունքների պաշտպանության» համար Բրազիլիայում և 750,000 դոլարի դրամաշնորհը Լիբանանում «միգրանտ տնային աշխատողների շարժման կառուցման» համար»,- գրում է լրատվամիջոցը։

Պետքարտուղար Մարկո Ռուբիոն երկուշաբթի երեկոյան ստորագրել է կրճատումները, և դրանք, ըստ Պետդեպի բարձրաստիճան պաշտոնյայի, կիրականացվեն այսօրվանից սկսած։

Թարգմանությունը՝ Էմմա Չոբանյանի