13.01.2026 | 16:31
Վինուս Ուիլյամսի մրցախաղում գրանցվել է տարիքային ռեկորդ. ՏԵՍԱՆՅՈՒԹ
Քարշ են տվել խոտերի մեջ, հայհոյել, հարվածել. Վարդանյանի խոշտանգման գործը 1 տարի անց փակուղում է. ՏԵՍԱՆՅՈՒԹ
Հասարակություն
15.04.2025 | 19:51
Ուղիղ մեկ տարի է անցել քաղաքացի Սամվել Վարդանյանի խոշտանգման մասին ահազանգից, սակայն մինչ օրս որևէ մեկը պատասխանատվության չի ենթարկվել։ Ավելին, նախաձեռնված քրեական վարույթով որևէ անձի նկատմամբ անգամ քրեական հետապնդում հարուցված չէ։
«Անցած տարվա մայիսին մի անգամ առերեսում եղավ ուղեկցող ոստիկանների հետ ու վերջ։ Այդ օրն իմ հագին եղած տաբատն ու կոշիկներն են տարել, ուրիշ ոչինչ»,- պատմում է Վարդանյանը։
Սամվել Վարդանյանի խոսքով՝ իրեն խոշտանգել են ոստիկանների ուղեկցությամբ ձերբակալվածների պահման վայր տեղափոխելու ճանապարհին` պատգամավոր Հակոբ Ասլանյանի հետ հասարակական տրանսպորտում տեղի ունեցած միջադեպից հետո։
Ըստ Սամվելի՝ դիմակավորված անձինք փակել են իր բերանը, որպեսզի օգնություն չկանչի։ Երբ արդեն տարել և նստեցրել են մեքենան, ոստիկաններն այդ պահին մոտեցել են։ Սամվելի խոսքով՝ ոստիկանները հեռվից նկարահանել են տեղի ունեցածը։
Սամվելը ո՛չ իրեն ուղեկցած ոստիկաններին, ո՛չ շտապօգնության աշխատակիցներին չի պատմել տեղի ունեցածը, ասում է՝ հետո ընկերներին ու փաստաբաններին է պատմել։ Սամվել Վարդանյանի փաստաբան Ռուբեն Մելիքյանի խոսքով՝ վարույթով որևէ առաջընթաց չկա, միակ նորությունն այն է, որ երկու ամիս առաջ ստացել են հագուստի դատաքիմիական փորձաքննության արդյունքները։
Իշխանական պատգամավոր Թագուհի Ղազարյանից այսօր հետաքրքրվեցինք՝ իր կարծիքով ինչո՞ւ մեկ տարի անց գործը դեռ դատարան չի հասել։ Ռուբեն Մելիքյանի խոսքով՝ սպասելի էր, որ մեկ տարի անց վարույթով որևէ առաջընթաց չի լինի։
Քննչական կոմիտեի մամուլի քարտուղար Կիմա Ավդալյանն էլ մեզ փոխանցեց, որ վարույթով նորություն չկա։ Փոխարենը շատ արագ դատարան հասավ Հակոբ Ասլանյանի հետ հասարակական տրանսպորտում միջադեպի գործը, որի վերաբերյալ երեկ արդեն դատավճիռ է հրապարակվել։
ՆԳՆ մամուլի քարտուղար Նարեկ Սարգսյանը չպատասխանեց Factor TV-ի հարցին՝ ասելով, որ վարույթ կա նախաձեռնված և հարցն իրենց տիրույթում չէ։ Դեպքից հետո ՆԳՆ-ում ծառայողական քննություն էր նշանակվել, ապա քրեական վարույթով պայմանավորված՝ կասեցվել էր։ Մեր տեղեկություններով՝ Սամվել Վարդանյանին ՁՊՎ ուղեկցած ոստիկանները ոչ միայն շարունակում են աշխատել համակարգում, այլև նրանից մեկը պաշտոնի բարձրացում է ստացել։
Մանրամասները՝ տեսանյութում։
Արփի Հակոբյան
