Մարտուն Գրիգորյանը ավագանու մանդատից հրաժարվելու դիմում է ներկայացրել

Գյումրի համայնքի ընտրություններում «Մեր քաղաքը» դաշինքի ցուցակը գլխավորող ԱԺ պատգամավոր Մարտուն Գրիգորյանը ավագանու մանդատից հրաժարվելու դիմում է ներկայացրել թիվ 31 ընտրատարածքային հանձնաժողով: Այդ մասին հայտնեցին ԿԸՀ-ից:

Հանձնաժողովը գրանցումն ուժը կորցրած է ճանաչել, այսպիսով՝ Մարտուն Գրիգորյանն ավագանու անդամության ինքնաբացարկ է հայտնել:

«Մեր քաղաքը» դաշինքի Գյումրիի համայնքապետի թեկնածու Մարտուն Գրիգորյանը տասը օր առաջ գրառմամբ հայտարարել էր, որ իր գլխավորած դաշինքը կտա անհրաժեշտ քանակությամբ քվե՝ մյուս երկու ուժերի կողմից սատարվող թեկնածու Վարդան Ղուկասյանին՝ առանց որևէ պաշտոնի, ակնկալիքի և որևէ պայմանավորվածության։ Գրիգորյանը գրառման մեջ նշել էր՝ համոզված է, որ Ղուկասյանը ամենախոցելի թեկնածուն է՝ քրեական գործերով պայամանավորված։ Այս հայտարարությունից ավելի վաղ Գրիգորյանը մեկ այլ գրառում էր արել՝ նշելով, որ ՔՊ-ն Գյումրիում քաղաքապետ չի ունենա։

Գյումրիի ավագանու առաջին նիստը կայանալու է ապրիլի 16-ին։ Այդ օրը քաղաքապետի երկու թեկնածու է առաջադրվելու` «Հայաստանի կոմունիստական կուսակցության» ցուցակով առաջադրված Վարդան Ղուկասյանը և «Քաղաքացիական պայմանագիր» կուսակցությունից Սարիկ Մինասյանը։ Սպասվում է, որ քաղաքապետ կընտրվի Գյումրիի նախկին քաղաքապետ Վարդան Ղուկասյանը. անցողիկ շեմը հաղթահարած ընդդիմադիր ուժերը հայտարարել են Ղուկասյանին սատարելու մասին։

ՔՊ-ն թեև չունի բավարար մանդատներ իր թեկնածուին անցկացնելու համար, բայց առանձին ՔՊ-ականներ հայտարարել են, որ Սարիկ Մինասյանը ևս այդ օրն առաջադրվելու է։ Չնայած Մարտուն Գրիգորյանը, Ռուբեն Մխիթարյանը և Կարեն Սիմոնյանը հայտարարել են Վարդան Ղուկասյանին աջակցելու մասին, բայց միաժամանակ շեշտել են, որ պատասխանատվություն չեն կիսելու։