25.08.2026 | 23:30
Ծանրորդ Հարություն Ավետիսյանը` պատանիների Եվրոպայի առաջնության բրոնզե մեդալակիր
Վարդանյանը մեղավոր ճանաչվեց խուլիգանության հոդվածով. բողոքարկելու ենք. Ռուբեն Մելիքյան․ ՏԵՍԱՆՅՈՒԹ
Հասարակություն
08.04.2025 | 17:35
Ավտոբուսում պատգամավոր Հակոբ Ասլանյանի հետ կապված միջադեպի գործով քաղաքացի Սամվել Վարդանյանն այսօր խուլիգանություն կատարելու հոդվածով մեղավոր ճանաչվեց, իսկ քաղաքական կամ այլ հայացքներով պայմանավորված թշնամանք կամ անհանդուրժողականություն հրահրելու հոդվածով՝ անմեղ։ Նրա պաշտպան Ռուբեն Մելիքյանը դատարանի բակում լրագրողների հետ զրույցում ասաց, որ գոհ չեն կայացված վերդիկտից, քանի որ միջնորդել էին Սամվել Վարդանյանին արդարացնել ներկայացված երկու մեղադրանքով։
«Խուլիգանությունով եղավ մեղադրական վերդիկտ, որը ոչ մեծ ծանրության արարք է, նախատեսում է մինչև 2 տարվա ազատազրկում, բայց ՔՕ-ում կա մեկ այլ հոդված՝ համաձայն որի առաջին անգամ ոչ մեծ ծանրության արարք կատարած անձին արգելվում է նշանակել ազատազրկում։ Այսինքն՝ Սամվել Վարդանյանի նկատմամաբ ազատազրկում նշանակվել չի կարող։ Իսկ մյուս հոդվածով, որը 1-4 տարով ազատազրկում էր նախատեսում, դատարանը կայացրեց արդարացման վերդիկտ։ Այս մասով մենք գոհ ենք դատարանից, մյուս մասով մենք վերաքննիչ բողոք ենք ներկայացնելու»,- նշեց Մելիքյանը։
«Ավտոբուսի գործով» հաջորդ դատական նիստին լրացուցիչ դատալսումների փուլն է, քննարկվելու են պատժատեսակն ու պատժաչափը։
Մանրամասները՝ տեսանյութում։
Արփի Հակոբյան
