Ալիևն իրանցի նախարարի հետ Հյուսիս-Հարավ միջանցքի զարգացման, Արաքս գետի վրայով կառուցվող կամրջի հարցեր է քննարկել

Ադրբեջանի նախագահ Իլհամ Ալիևը Բաքվում ընդունել է Իրանի ճանապարհների և քաղաքաշինության նախարար, Տնտեսական համագործակցության ադրբեջանա-իրանական միջկառավարական համատեղ հանձնաժողովի համանախագահ Ֆարզանե Սադեղին։ Ըստ ադրբեջանական լրատվամիջոցների՝ գոհունակությամբ նշելով վերջին շրջանում Ադրբեջանի և Իրանի բարձրաստիճան պատվիրակությունների փոխայցելությունների ինտենսիվ բնույթը, Ալիևն ասել է, որ դա երկու երկրների միջև բարեկամության ամրապնդման և երկկողմ համագործակցության հետագա զարգացման լավ հնարավորություն է ստեղծում։

Ադրբեջանի նախագահը դրական է գնահատել նաև ադրբեջանա-իրանական տնտեսական համագործակցության միջկառավարական համատեղ հանձնաժողովի նիստի անցկացումը՝ նշելով, որ դրա օրակարգում ընդգրկված են առևտրի, տնտեսական, էներգետիկ, տրանսպորտի և այլ ոլորտներում համագործակցության զարգացման կարևոր նախագծեր։

Հայտարարելով, որ Իրանը շահագրգռված է Ադրբեջանի հետ բոլոր ոլորտներում հարաբերությունների զարգացմամբ, Սադեղը ևս մեկ անգամ ընդգծել է, որ Իրանի նախագահի՝ Ադրբեջան նախատեսվող այցի նախօրեին միջկառավարական համատեղ հանձնաժողովի նիստի անցկացումը չափազանց կարևոր է օրակարգային հարցերի քննարկման տեսանկյունից։

Ըստ ադրբեջանական կողմի՝ հանդիպմանը մտքեր են փոխանակվել Հյուսիս-Հարավ տրանսպորտային միջանցքի զարգացման, Արաքս գետի վրա Աղբենդ և Քելալե կետերը միացնող կամրջի կառուցման, ինչպես նաև փոխադարձ հետաքրքրություն ներկայացնող այլ ոլորտներում համագործակցության շուրջ։

Թարգմանությունը՝ Էմմա Չոբանյանի