07.12.2025 | 21:40
Վարդենյաց լեռնանցքում ձյուն է տեղում. Դիլիջանի, Սպիտակի ոլորաններում մառախուղ է
Անհրաժեշտ է վերանայել անվտանգության մեր ընկալումը. Սոնա Ղազարյանը ԵԽԽՎ-ում՝ TikTok-ի և այլ հարթակների՝ ընտրությունների արդյունքների վրա ազդելու մասին
Հասարակություն
08.04.2025 | 16:39
ՀՀ ԱԺ պատվիրակությունը մասնակցում է Ստրասբուրգում ընթացող Եվրոպայի խորհրդի խորհրդարանական վեհաժողովի (ԵԽԽՎ) տարեկան նստաշրջանի երկրորդ մասի աշխատանքներին․ տեղեկացնում են ՀՀ ԱԺ-ից։
Նստաշրջանի ընթացքում ելույթ է ունեցել պատվիրակության անդամ Սոնա Ղազարյանը:
«Տիկի՛ն նախագահ, հարգարժա՛ն գործընկերներ,
Արտաքին միջամտությունն այլեւս բացառիկ երեւույթ չէ: Այն վերածվում է մշտական ճնշման՝ անաղմուկ, ռազմավարական եւ հաճախ անտեսանելի: Այն չի դրսեւորվում բացահայտ ագրեսիայի ձեւով:
Արտաքին միջամտությունը մեկ հարված չէ, այլ ռազմավարություն. ապատեղեկատվական արշավներ, որոնք կասկածներ են սերմանում մեր ընտրություններում, կիբեռհարձակումներ, որոնք խարխլում են վստահությունը մեր հաստատությունների նկատմամբ, ֆինանսական խողովակներ, որոնք թափանցում են քաղաքական դաշտ եւ նպատակային փորձեր՝ ներսից բեւեռացնելու եւ ապակայունացնելու բաց հասարակությունները:
Վերջերս գնալով ավելանում է մտահոգությունն այն մասին, թե ինչպես են TikTok-ը եւ նման հարթակներն ու սոցիալական մեդիայի այլ ձեւերը ազդում ընտրությունների արդյունքների վրա: Հայաստանում եւս մենք բախվում ենք նմանատիպ մարտահրավերների: Varieties of Democracy նախաձեռնությունն արձանագրել է, որ արտաքին միջամտությունն առկա է նաեւ Հայաստանում՝ լրատվամիջոցների միջոցով, որոնք ֆինանսավորվում են երրորդ կողմից: Որպես օրենսդիր՝ ես արձագանքում եմ երկու առանցքային ուղղությամբ՝ օրենսդրական նախաձեռնություններ՝ ֆինանսավորման թափանցիկությունն ապահովելու համար եւ մեդիագրագիտության զարգացման ներդրումներ՝ դեռ վաղ տարիքից:
Բայց կա ելք: Եվ այն սկսվում է հստակ պատկերացումից, թե ինչի առաջ ենք կանգնած եւ ինչ լուծումներ են անհրաժեշտ: Անհրաժեշտ է վերանայել անվտանգության մեր ընկալումը. այն պետք է լինի ոչ միայն ազգային, այլեւ ժողովրդավարական, ոչ միայն ռազմական, այլեւ թվային, տեղեկատվական եւ քաղաքացիական: Մենք պետք է ներդրումներ կատարենք ոչ միայն պաշտպանական համակարգերում, այլեւ հանրային դիմադրողականության մեջ: Պետք է ամրապնդենք մեր հասարակությունների դիմակայունությունը՝ կրթության, մեդիագրագիտության եւ թափանցիկության միջոցով:
Եվ ամենակարեւորը՝ պետք է միասին աշխատենք»- ասել է պատգամավորը:
