Քաղաքականություն
08.04.2025 | 12:10
Գյումրիի համայնքապետի պաշտոնակատար, ընտրություններում ՔՊ-ի թեկնածու Սարիկ Մինասյանը քննադատությունների կենտրոնում է հայտնվել Ֆեյսբուքում արված մի մեկնաբանության պատճառով։ Մինասյանը երեկ սոցիալական ցանցում շնորհավորել էր կանանց Մայրության և գեղեցկության տոնի առիթով, ինչին ի պատասխան օգտատերերից մեկը վիրավորական մեկնաբանություն էր թողել հետևյալ բովանդակությամբ․ «Բայց ՔՊ-ից շնորհավորանք ընդունելը ժեխություն է, մարդ ինչքան ժեխ պտի էղնի, որ ըսոնց ետևից էրտա»։
Այս մեկնաբանությանն ի պատասխան Սարիկ Մինասյանն էլ իր հերթին վիրավորական տոնով արձագանքել է․ «Դու քո էությամբ ես դա։ Ամուսին, եղբայր ունես, համար տու, անուն ասա իրան բացատրենք, կին ես ի՞նչ քեզ ասեմ»։
Factor.am-ը թեմայի վերաբերյալ մեկնաբանություն խնդրեց Սարիկ Մինասյանից, թե ինչո՞ւ է քաղաքացուն «ռազբորկայի» կանչում։
«Ուզել եմ, որ բացատրեմ՝ էդ շնորհավորանքը իրեն էլ կվերաբերվի, ինչպես հազարավոր մայրերի, քույրերի։ Ոչ ոք չի քննադատում, որ նա հազարավոր մայրերի ու քույրերի վիրավորել է այդ բառով, իսկ ես որ գրել եմ՝ համար տուր, որ բացատրեմ դա «ռազբորկա՞» է։ Որ համարը տար բացատրելու էի, որ մայրերին ու քույրերին չեն վիրավորում, որովհետեև մայրերն ու քույրերը մեր սրբություններն են, չի կարելի քաղաքական առումով թիրախավորել»,- Factor.am-ի հետ զրույցում ասաց Սարիկ Մինասյանը։
Ուշագրավ է, որ Մինասյանը քննադատում է օգտատիրոջն այն շեշտադրմամբ, որ անթույլատրելի է վիրավորելը, բայց ինքն է փոխադարձ վիրավորանքով պատասխանում՝ նշելով՝ «էությամբդ ես ժեխը»։
Մինասյանից հետաքրքրվեցինք, եթե վիրավորանքն անթույլատրելի է համարում՝ ինչո՞ւ է ինքը նման կերպ պատասխանում։ «Եթե նա հազարավոր մարդկանց վիրավորում է, ուրեմն էությամբ ինքն է այդպիսին»,- կրկին ասաց Մինասյանը։
Նարեկ Կիրակոսյան
