29.04.2026 | 23:40
Հայաստան–ՄԱԿ համագործակցություն․ ուշադրության կենտրոնում՝ խոցելի խմբերի պաշտպանությունը
Թուրքիայի ընդդիմության առաջնորդը հայտարարել է, թե Ստամբուլի քաղաքապետը ձերբակալվել է Թրամփի թույլտվությամբ
Քաղաքականություն
07.04.2025 | 13:00
Թուրքիայի ընդդիմադիր Ժողովրդահանրապետական կուսակցության (CHP) 21-րդ արտահերթ համագումարում Օզգուր Օզելը վերընտրվել է CHP-ի նախագահի պաշտոնում։ Թուրքական լրատվամիջոցների հաղորդմամբ՝ նա միակ թեկնածուն է եղել։ Ումիթ Ույսալը, որն ավելի վաղ հայտարարել էր իր թեկնածությունն առաջադրելու մասին, համագումարից առաջ գրավոր հայտարարությամբ դուրս է եկել ընտրապայքարից։
Ընդդիմադիր կուսակցության համագումարից հետո Անկարայում հանրահավաք է տեղի ունեցել։ Օզգուր Օզելը հայտարարել է, որ Ստամբուլի ընդդիմադիր քաղաքապետ Էքրեմ Իմամօղլուի ձերբակալության թույլտվությունը տրվել է ԱՄՆ-ից։
«Ես կոչ եմ անում Էրդողանին՝ հեղաշրջման փորձ կատարած խունտայի առաջնորդին, դուրս եկեք և մեզ ուղիղ ասեք՝ արդյո՞ք հեղաշրջումը, որը փորձում եք իրականացնել հաջորդ նախագահի՝ ձեր մրցակցի դեմ, ստացել է Ամերիկայի թույլտվությունը։ Խունտայի ղեկավարին ասում եմ՝ ո՛չ Ամերիկան, ո՛չ Թրամփը ձեզ չեն փրկի առաջիկա ընտրություններում»,- ասել է Օզելը։
Նա նաև կոչ է արել համընդհանուր ընտրությունները Թուրքիայում անցկացնել ամենաուշը նոյեմբերին։
Ընդդիմադիր կուսակցապետին մեկը մյուսի հետևից արձագանքել են Թուրքիայի կառավարության անդամներն ու իշխող՝ «Արդարություն և զարգացում» կուսակցության ներկայացուցիչները։
«Իմացի՛ր քո տեղը։ Մեր նախագահ Էրդողանը տարիներ շարունակ ծառայել է Թուրքիային մեր ազգից ստացած աջակցությամբ և պայքարել բոլոր տեսակի խնամակալության դեմ։ Հենց Օզգյուր Օզելն է ներկայացնում այն ավանդույթը, որը երկար տարիներ զբաղվել է քաղաքականությամբ՝ ժողովրդի կամքին հակառակ հեղաշրջումների ստվերի ներքո։ Օզգյուր Օզելն է, որ քվեատուփից այն կողմ լեգիտիմություն է փնտրում և փորձում է քաղաքականություն ձևավորել փողոցներում։ Հենց Օզգյուր Օզելն է փորձում հերոսական պատմություն կերտել կոռուպցիայի հետ կապված գործից։ Մենք մերժում ենք անձնական հավակնությունները դավադրության տեսությունների հետ խառնող և քաղաքականության քողի տակ ներկայացնող այս մտածելակերպը»,- X-ի իր միկրոբլոգում, մասնավորապես, գրել է Թուրքիայի ԱԳ նախարար Հաքան Ֆիդանը։
Հիշեցնենք, որ մարտի 19-ին Ստամբուլի ընդդիմադիր քաղաքապետ Էքերմ Իմամօղլուի ձերբակալությունից, ապա կալանավորումից հետո Թուրքիայում շարունակվում են տարաբնույթ բողոքի ակցիաները։
Թարգմանությունը՝ Էմմա Չոբանյանի
