Ափսոսում եմ, որ իմ մեկնաբանությունը ցավ ու տհաճություն Է պատճառել արցախցիներին․ Հանրային ռադիոյի տնօրենի կինը ներողություն է խնդրել

Հանրային ռադիոյի տնօրեն Արմեն Քոլոյանի կինը՝ Շուշան Ղազարյանը, ներողություն է խնդրել արցախցիներից՝ նրանց վիարվորելու համար։

«Ափսոսում եմ, որ իմ մեկնաբանությունը ցավ և տհաճություն Է պատճառել արցախցիներին: Ինձ ճանաչող արցախցիները լավ գիտեն, որ անհաշիվ անգամներ եմ եղել այդ աշխարհում որպես լրագրող և կյանքիս մեծ մասն եմ նվիրել այդ աշխարհին, երազելով նրա ազատությունն ու երջանկությունը, մի քանի տասնյամյակների ընթացքում մի քանի տասնյակ հարազարատ ընկերներ և ընկերուհիներ եմ կորցրել՝ հայաստանցի և ղարաբաղցի: Ցավում եմ, որ դառնությունս և զայրութս վերաճել են սուր խոսքի, հայցում եմ դրանից վիրավորված արցախցիների ներողամտությունը: Ինձ ճանաչող արցախցիները գիտեն իմ սերը նրանց հանդեպ, թե վիրավորել եմ՝ թող ներեն»,- ֆեյսբուքում գրել է Ղազարյանը։
Հիշեցնենք՝ նա երեկ արցախցիների սոցիալական խնդիրներին առնչվող հրապարակման ներքո գրել էր․
«Աստծուց մոռացված դժբախտներ, մեր հացը լափում եք, մեր դեմ միավորվո՞ւմ: Դուք մեկի հետ յոլա գնալ կարող ե՞ք»։

Արմեն Քոլոյանը Factor.am-ին երեկ հայտնել էր, որ կնոջ գրառումները չի կարդում։

«Դուք ուզո՞ւմ եք ես մեկնաբանեմ իմ կնոջ ֆեյսբուքյան ստատուսը։ Ես ոչ մեկնաբանում եմ, ոչ էլ, մեր մեջ ասած, կարդում եմ նրա ստատուսները։ Ինձ դա չի հետաքրքրում, թե ինչ է գրել։ Կարող եք ասել, որ Արմեն Քոլոյանն ասաց՝ ո՛չ կարդում է, ո՛չ էլ մեկնաբանում է»:

Իսկ իր համար ընդունելի՞ է արցախցիների մասին այդպիսի գրառումը. մեր այս հարցից հետո Արմեն Քոլոյանն ընդհատել էր հեռախոսազրույցը։

Արփի Հակոբյան