Ինքնուրո՞ւյն է որոշել, թե՞ պարտադրել են․ Աշոտ Մելիքյանը՝ Վիլեն Գաբրիելյանի մանդատը վայր դնելու մասին

«Երբ պատգամավորը որոշում է մանդատը վայր դնել, դա իսկապես դրական քայլ է, մյուս կողմից հարց է առաջանում՝ այդ որոշումն ինքնուրո՞ւյն է կայացրել, թե՞ իրեն դրդել են, կամ պարտադրել, որպեսզի իր մանդատը վայր դնի»,- Factor.am-ի հետ զրույցում ասում է Խոսքի ազատության պաշտպանության կոմիտեի նախագահ Աշոտ Մելիքյանը:

Նրա խոսքով՝ վերջին շրջանում բազմաթիվ օրինակներ կան, թե ինչպես են պատգամավորները ոչ պատշաճ վարքագիծ դրսևորում, այդ թվում՝ նաև լրագրողների նկատմամբ, և դա մնում է անհետևանք։

«Սա կարող է, և պետք է օրինակ լինի ոչ միայն «Քաղաքացիական պայմանագրի», այլև բոլոր պատգամավորների համար։ Երբ քաղաքական գործիչը ինքն է գնահատում իր վարքագիծը և համապատասխան քայլի դիմում, դա կարևոր է»,- ընդգծում է Մելիքյանը։

Վիլեն Գաբրիելյանն այսօր նաև տեղեկացրել է, որ «Քաղաքացիական պայմանագիր» կուսակցության առաջիկա վարչության ընտրություններում ինքնաառաջադրվում է՝ որպես վարչության անդամի թեկնածու։

«Ինձ համար միանշանակ է, որ մեր կուսակցությունը ունի լրջագույն առողջացման և կերպարանափոխման կարիք»,- ֆեյսբուքում գրել է Գաբրիելյանը՝ չմանրամասնելով, թե ինչ առողջացման մասին է խոսքը: Աշոտ Մելիքյանը նշում է՝ կուսակցությունն իր և՛ դիրքորոշումները, և՛ քաղականությունը վերանայելու կարիք ունի։

«Գյումրիում և Փարաքարում ընտրությունները ցույց տվեցին, որ վստահությունը այդ քաղաքական ուժի նկատմամբ կտրուկ նվազել է, և դրա պատճառը, իմ կարծիքով, բարեփոխումների, որոշ առումով ձախողումն է, իսկ որոշ առումով՝ դանդաղեցումը։ Իհարկե, շատ կարևոր է նաև կուսակցության անդամների բարեվարքությունը», – նշում է Խոսքի ազատության պաշտպանության կոմիտեի նախագահը։

Մելիքյանը նկատում է՝ եթե հեղափոխությունից հետո «Քաղաքացիական պայմանգիր» կուսակցության անդամների վարկանիշը բարձր էր, ապա վերջին տարիներին այդ առումով լուրջ խնդիրներ կան։

Անի Թամրազյան