Գյումրիում և Փարաքարում մեկնարկեցին ՏԻՄ ընտրությունները

Փարաքար խոշորացված համայնքում և Գյումրիում մեկնարկեցին տեղական ինքնակառավարման մարմինների ընտրությունները։ Առավոտ ժամը 08:00-ին ՀՀ երկրորդ քաղաքում 111 հազար 236 ընտրողի համար բացվեցին 82, իսկ Փարաքարում՝ 20 հազար 967 անձի համար՝ 16 ընտրատեղամասեր։

Ընտրությունները լուսաբանելու նպատակով հավատարմագրվել է 38 լրատվամիջոցի 277 լրագրող: Քվեարկությանը կհետևի տեղական դիտորդական 5 կազմակերպություն՝ «Հայաքվե», «Ականատես դիտորդական առաքելություն», «Անկախ դիտորդ» հասարակական դաշինք, «Գյումրու առաջընթաց» քաղաքացիական հասարակության զարգացման կենտրոն ՀԿ և «Հայ առաջադեմ երիտասարդություն» ՀԿ: Հավատարմագրված տեղական դիտորդների ընդհանուր թիվը կազմում է 347:

Փարաքարում համայնքի ղեկավարումը ստանձնելու համար հայտ է ներկայացրել քաղաքական չորս ուժ՝ «Քաղաքացիական պայմանագիր», «Ազգային առաջընթաց», «Կայունություն» կուսակցությունները և «Միասնություն» կուսակցությունների դաշինքը՝ բաղկացած «Ապրելու երկիր» և «Հաղթանակ» կուսակցություններից:

Գյումրիում պայքարի մեջ է մտել 9 քաղաքական ուժ՝ 3 դաշինք և 6 կուսակցություն. «Հայաստանի կոմունիստական կուսակցություն», «Իմ հզոր համայնք» «Հայաստանի աշխատավորական սոցիալիստական կուսակցություն», «Ապրելու երկիր», «Դեմոկրատական այլընտրանք» և «Քաղաքացիական պայմանագիր» կուսակցությունները, ինչպես նաև «Մեր քաղաքը», «Եվրադաշինք» և «Մայր Հայաստան» դաշինքները։

Ընտրատեղամասերը կգործեն մինչև 20:00-ն, ինչից հետո դրանք կփակվեն և կսկսվի քվեաթերթիկների հաշվարկը։