Ասլանյանն ասում է` «այ ոչխար, հիմար», դրանից է սկսվում. պաշտպան․ ՏԵՍԱՆՅՈՒԹ

Երևան քաղաքի առաջին ատյանի ընդհանուր իրավասության քրեական դատարանի Աջափնյակ նստավայրում` դատավոր Դավիթ Արղամանյանի նախագահությամբ շարունակվեցին ավտոբուսում ԱԺ պատգամավոր Հակոբ Ասլանյանի և քաղաքացի Սամվել Վարդանյանի միջև տեղի ունեցած միջադեպի գործով հիմնական դատալսումները։ Պաշտպանության կողմը հանդես եկավ եզրափակիչ ելույթներով: Դատական նիստին ներկա չէր տուժող Հակոբ Ասլանյանը:

Պաշտպաններից Վարազդատ Հարությունյանն իր ելույթում ասաց, որ ավտոբուսում կոնֆլիկտ է տեղի ունեցել, որին մասնակցել են Սամվել Վարդանյանն ու Հակոբ Ասլանյանը։

«Կոնֆլիկտի ականատեսներն ուղևորներն ու ավտոբուսի հարգարժան վարորդն են եղել, որը հարցաքննվեց դատարանում։ Գործում եղած ապացույցների հետազոտությունը, տեսանյութը նաև Սամվել Վարդանյանի հարցաքաննությունը ցույց տվեցին, որ որ վերջինս 42 համարի ավտոբուսի մնացած ուղևորների հետ որևէ խնդիր չի ունեցել, իր խնդիրը եղել է քաղաքացիական դիրքորոշումը իշխանական լիազորություններով օժտված պաշտոնյայի նկատմամբ քննադատական երանգներով արտահայտվելու մեջ։ Եթե Ասլանյանի փոխարեն լինեին այլ պատահական ուղևորներ, այդ միջադեպը տեղի չէր ունենա։ Այսինքն՝ այստեղ խնդիրը Սամվել Վարդանյանի և Հակոբ Ասլանյանի միջև է։ Մենք այս գործի քննության շրջանակներում մանրամասն անդրադարձել ենք Սամվել Վարդանյանի արտահայտած բոլոր բառերին, պահվածքին, տոնայնությանը։ Բայց քննության առարկա չի դարձել Հակոբ Ասլանյանի վարքը։ Սամվել Վարդանյանը շատ հանգիստ տոնով հարցադրում է անում՝ «մարդամե՞ջ եք դուրս եկել», այդ հանգիստ տոնից հոտո Հակոբ Ասլանյանն ասում է՝ «ա՛յ ոչխար, հիմա՛ր», հետո էլ հարվածում է, և Սամվել Վարդանյանը դրանից հետո բարձր տոնով ասում է՝ «ես քեզ խփեցի՞, որ դու ինձ խփեցիր»,- ասաց Հարությունյանը եզրափակիչ ելույթում։

Մանրամասները՝ տեսանյութում։