Թուրքիան չի հանձնվի փողոցային տեռորին. Էրդողանը` բողոքի ակցիաների մասին

Թուրքիայի նախագահ, երկրի իշխող «Արդարություն և զարգացում» կուսակցության ղեկավար Ռեջեփ Թայիփ Էրդողանն արձագանքել է ընդդիմադիր Ժողովրդահանրապետական կուսակցության (CHP) նախագահ Օզգուր Օզելի կոչին, որը քաղաքացիներին կոչ էր արել այսօր երեկոյան իֆթարից հետո փողոց դուրս գալ՝ ի նշան Ստամբուլի քաղաքապետարանի հետաքննության շրջանակում տասնյակ մարդկանց, այդ թվում՝ քաղաքապետ Էքրեմ Իմամօղլուի ձերբակալության դեմ բողոքի։

«Այն փողոցը, ուր կանչում է CHP-ի նախագահը, փակուղի է։ Հասկանալի է, որ CHP-ն պետք է հեռու մնա ոչ միայն մունիցիպալիտետներ ներխուժած ավազակներից, այլև մարգինալ կառույցներից և ահաբեկչական կազմակերպություններից»,- ասել նա։

Էրդողանը հավելել է՝ «ինչպես երբեք չեն տրվել փողոցային տեռորին, այնպես էլ չեն տրվելու վանդալիզմին»։

«Այնպիսի հատուկ օրը, երբ մենք միասին նշում ենք Նովրուզը, մենք ականատես ենք լինում Ստամբուլի կոռուպցիոն գործողությունը որպես պատրվակ օգտագործելով՝ մեր փողոցներում քաոս մտցնելու փորձի։ Մենք աչք չենք փակի մի խումբ ապաշնորհ, հավակնոտ մարդկանց գործողությունների վրա, որոնք սպառնում են մեր երկրի խաղաղությանը, հրահրում մեր ժողովրդին և փորձում են ահաբեկել Թուրքիային, որպեսզի չվնասեն սեփական բարեկեցությանը, շահերին և թալանին։ Փողոցը, որի կոչն արել է CHP նախագահը, փակուղի է։ Նրա կողմից անպատասխանատու է դատարանի դահլիճի փոխարեն փողոցը մատնացույց անելը, կեղծիքներն ու անօրինությունները պաշտպանելը։ Թուրքիան այն երկիր չէ, որը փողոցում է, այն չի հանձնվի փողոցային տեռորին»,- հայտարարել է Էրդողանը։

Հավելենք, որ Թուրքիայի տարբեր քաղաքներում այսօր շարունակվել են բողոքի ակցիաները, հատկապես, ուսանողների մասնակցությամբ։ Ոստիկանության կողմից կրկին ուժի կիրառմամ դեպքեր են գրանցվել։

Թարգմանությունը՝ Էմմա Չոբանյանի