12.01.2026 | 11:36
Սփյուռքի մեր հայրենակիցներին խաթարված ձևով է ներկայացվում ճշմարտությունը․ Զարեհ Սինանյան․ ՏԵՍԱՆՅՈՒԹ
Պապիկյանը հստակ չի պատասխանում, Factor TV-ի աղբյուրները հաստատում են՝ գիշերը Սոթքում կրակոցների ձայներ են լսվել
21.03.2025 | 13:41
Մինչ Պաշտպանության նախարար Սուրեն Պապիկյանն Ազգային ժողովում լրագրողների հետ զրույցում հստակ պատասխան չի տալիս՝ ադրբեջանական կողմը գիշերը կրակել է Սոթքում, թե ոչ, Factor TV-ի աղբյուրները հաստատում են տեղեկությունը։ Կրակոցներ հնչել են մոտավորապես ժամը 00։00-ից մինչև 03։00-ի միջակայքում։ Թե քանի՞ կրակոց է արձակվել՝ մեր աղբյուրները դժվարանում են ասել, սակայն նշում են որ դրանք սակավաթիվ չեն եղել։
Սոթքի ուղղությամբ հնչած կրակոցների վերաբերյալ լրագրողների հարցերին ի պատասխան Պապիկյանն այսօր ԱԺ-ում ճեպազրույցի ժամանակ ասաց․ «Բոլոր վտանգավոր կրակոցները, խախտումները, որոնք ուղղված են մեր դիրքերի, մեր անձնակազմի վրա, մշտապես ՊՆ-ի կողմից տրվել են հաղորդագրություններ և բացատրություններ»,- ասաց Պապիկյանը՝ այդպես էլ ուղիղ չպատասխանելով գիշերը կրակոցներ եղե՞լ են, թե՞ ոչ։
Հիշեցնենք, որ օրեր առաջ՝ մարտի 19-ին, Նիկոլ Փաշինյանը ֆեյսբուքում գրել էր, որ ՀՀ ՊՆ-ին հանձնարարել է հրադադարի ռեժիմի ոչ մի խախտում չանել։
«Հայաստանը գնում է խաղաղության և ոչ թե պատերազմի»,- գրել էր Փաշինյանը։
Ադրբեջանական կողմն արդեն 6-րդ օրն անընդմեջ գրում է, թե իբր ՀՀ ԶՈՒ-ն կրակ է բացել իրենց դիրքերի ուղղությամբ։ Հայաստանի ՊՆ-ն հերքել է բոլոր հաղորդագրությունները։ Հակառակորդի այսօրվա տարածած հաղորդագրության մեջ էլ նշվում է, թե իբր ՀՀ ԶՈՒ ստորաբաժանումները կրակ են բացել սահմանագոտու արևելյան և հարավարևելյան հատվածներում տեղակայված ադրբեջանական դիրքերի ուղղությամբ։ Այսինքն՝ նշել են նաև Սոթքի ուղղությունը, որտեղ հենց իրենք են կրակել։
Արփի Հակոբյան
