Թրամփը կրթության դեպարտամենտի լուծարման հրամանագիր է ստորագրել

ԱՄՆ նախագահ Դոնալդ Թրամփը գործադիր հրաման է ստորագրել, որով լուծարվում է ԱՄՆ կրթության դեպարտամենտը։ Այսպիսով, նա կատարել է նախընտրական խոստումը՝ վերացնել գործակալությունը, որը երկար ժամանակ եղել է պահպանողականների թիրախը, գրում է AP-ն։

Նա հրամանը ստորագրել է Սպիտակ տանը հատուկ արարողության ժամանակ՝ շրջապատված աշակերտներով և ուսուցիչներով։

Թրամփը ծաղրել է Կրթության նախարարությունը՝ այն վատնիչ և լիբերալ գաղափարախոսությամբ աղտոտված որակելով:

Այնուամենայնիվ, դրա լուծարման ավարտը, հավանաբար, անհնար կլինի առանց Կոնգրեսի ակտի, որը ստեղծել է դեպարտամենտը 1979 թվականին: Հանրապետականներն ասել են, որ նախագիծ են ներկայացնելու այդ նպատակին հասնելու համար, մինչդեռ դեմոկրատներն ասել են, որ ընդդիմանալու են այդ գաղափարին:

Ստորագրման արարողության ժամանակ Թրամփը մեղադրել է գերատեսչությանը Ամերիկայի ակադեմիական թերացման համար և ասել, որ նահանգներն ավելի լավ կանեն այդ գործառույթը։

Ավելի վաղ Սպիտակ տունը հայտնել էր, որ Կրթության դեպարտամենտը կշարունակի կառավարել դաշնային ուսանողական վարկերը, բայց հրամանը, կարծես, այլ բան է հուշում։ Այն ասում է, որ դեպարտամենտը չունի անձնակազմ, որը վերահսկելու է իր 1,6 տրիլիոն դոլար վարկային պորտֆելը և «պետք է բանկային գործառույթները վերադարձնի մի կազմակերպության, որը կարող է սպասարկել Ամերիկայի ուսանողներին»:

Կրթության քարտուղար Լինդա Մաքմահոնն ասել է, որ ինքը կվերացնի բյուրոկրատական ​​ակտերը և թույլ կտա նահանգներին որոշել, թե որն է լավագույնն իրենց դպրոցների համար: Բայց նա խոստացել է շարունակել հիմնական ծառայությունները և աշխատել նահանգների ու Կոնգրեսի հետ՝ «օրինական և կանոնավոր անցում ապահովելու համար»: Նրա աշխատանքի մի մասը կլինի ուսումնասիրել, թե որ գործակալությունները կարող են ստանձնել Կրթության դեպարտամենտի տարբեր դերերը։

Թարգմանությունը՝ Էմմա Չոբանյանի