Բաքուն արձագանքել է ՀՀ վարչապետի աշխատակազմին ու կրկնել խաղաղության պայմանագրի ստորագրման նախապայմանները

«Մենք կտրականապես մերժում ենք Հայաստանի վարչապետի աշխատակազմի 2025 թվականի մարտի 18-ի հայտարարությունը, որը, Ադրբեջանի դեմ ուղղված բոլորովին անհիմն պնդումների հետ մեկտեղ, խեղաթյուրում է տեղում իրողությունները և սահմանամերձ շրջանների կրակոցների փաստերը»։ Այս մասին հայտարարել է Ադրբեջանի ԱԳՆ մամուլի քարտուղար Այխան Հաջիզադեն՝ մեկնաբանելով ՀՀ վարչապետի աշխատակազմի հայտարարությունը։

Նա շարունակել է կրկնել Ադրբեջանի ՊՆ-ի կեղծ տեղեկությունները, իբր, սահմանին կրակոցների մասին։

«Ինչ վերաբերում է Հայաստանի ենթադրյալ բարի կամքին խաղաղության համաձայնագրի տեքստն ավարտելու և միջպետական ​​հարաբերությունների հաստատման հարցում, հարկ է հիշեցնել, որ Ադրբեջանն էր, որ առաջին քայլերն արեց խաղաղության համաձայնագրի մշակման համար դեռևս 2022 թվականի սկզբին։ Սակայն չպետք է մոռանալ, որ Հայաստանն ամեն կերպ սաբոտաժի էր ենթարկում բանակցային գործընթացը։ Հայկական կողմը, բարի կամք դրսևորելու և նման սադրանքներից հրաժարվելու փոխարեն, առաջարկում է ոչ մի հիմք չունեցող բարդ և գործնականում անհնարին նախաձեռնություններ։ Դա հիշեցնում է Մինսկի խմբի համանախագահների առաջարկությունները։ Եթե ​​Հայաստանի կառավարությունը, ինչպես պնդում է վարչապետի գրասենյակը, իսկապես ունի խաղաղության օրակարգ, տեղին կլինի բացատրություն տա, թե ինչպես է զանգվածային ռազմականացումը, ներառյալ՝ սահմանամերձ շրջաններում հարվածային զենքի տեղակայումը, ծառայում այս օրակարգին»,- ասվում է Ադրբեջանի ԱԳՆ ներկայացուցչի հայտարարության մեջ։

Բաքուն շարունակում է նաև իր նախապայմաններն առաջ քաշել խաղաղության պայմանագրի ստորագրման համար։

«Լուրջ մտահոգություն է առաջացնում նաև այն, որ չնայած տեղյակ լինելով Ադրբեջանի նկատմամբ տարածքային պահանջներին վերջ տալու համար Սահմանադրության փոփոխության երկարամյա պահանջին, Հայաստանն անտեսում է այս կոչը։ Մենք ևս մեկ անգամ ցանկանում ենք ուշադրություն հրավիրել Ադրբեջանի հիմնարար դիրքորոշման վրա, այն է՝ բանակցված տեքստի ստորագրման հիմնական պայմանը Հայաստանի Սահմանադրության մեջ փոփոխություններ մտցնելն է՝ Ադրբեջանի ինքնիշխանության և տարածքային ամբողջականության նկատմամբ հավակնությունները վերացնելու նպատակով։ Միևնույն ժամանակ, մենք ընդգծում ենք հնացած և անգործունակ Մինսկի խմբի և համապատասխան կառույցների պաշտոնական լուծարման անհրաժեշտությունը»,- ասել է Հաջիզադեն։

Նա, միաժամանակ, Հայաստանին մեղադրել է պարտավորությունները չկատարելու մեջ։

«Չնայած Ադրբեջանի արևմտյան շրջանները Նախիջևանի Ինքնավար Հանրապետության հետ կապող հաղորդակցությունների բացման գրավոր և ստորագրված պարտավորություններին՝ Հայաստանը 4 տարվա ընթացքում չի կատարել այդ պարտավորությունները։ Փոխարենը առաջարկներ են անում ոչ ակտուալ, դժվար իրագործելի և գործնականում երկար երթուղիների համար՝ փորձելով ուշադրությունը շեղել գործընթացից և իրենց պարտականություններից։ Եթե ​​հայկական կողմն իսկապես շահագրգռված է տարածաշրջանում հաղորդակցությունների բացմամբ, ապա չպետք է խուսափի իր պարտավորություններից և գործնական քայլեր ձեռնարկի տարածաշրջանում նոր իրողություններին համապատասխան հաղորդակցությունների բացման ուղղությամբ»,- նշել է Ադրբեջանի ԱԳՆ խոսնակը։

Թարգմանությունը՝ Էմմա Չոբանյանի