05.12.2025 | 23:32
ԱԱ․ Բաչկովը հաղթել է ժամկետից շուտ, Մաշակարյանը և Հովհաննիսյանը ևս շարժվում են առաջ
Թրամփն ու Էրդողանը հեռախոսազրույց են ունեցել
Քաղաքականություն
17.03.2025 | 11:18
Թուրքիայի նախագահ Ռեջեփ Թայիփ Էրդողանը կիրակի հեռախոսազրույց է ունեցել նախագահ Դոնալդ Թրամփի հետ՝ շոշափելով մի շարք հարցեր, այդ թվում՝ Ռուսաստան-Ուկրաինա հակամարտությունը: Թրամփի նախագահի պաշտոնին վերադառնալուց հետո սա երկու երկրների նախագահների առաջին պաշտոնական հեռախոսազրույցն է։ Թուրքիայի նախագահականի հաղորդակցության վարչության տարածած հաղորդագրության համաձայն՝ կողմերը քննարկել են Թուրքիայի և ԱՄՆ-ի երկկողմ հարաբերությունները, ինչպես նաև տարածաշրջանային և գլոբալ խնդիրներ։
«Հայտարարելով, որ տարածաշրջանային և գլոբալ զարգացումները պահանջում են Թուրքիայի և ԱՄՆ-ի միջև բոլոր հարցերի շուրջ խորհրդակցություններ՝ նախագահ Էրդողանը նշել է, որ Թուրքիան աջակցում է նախագահ Թրամփի վճռական և անմիջական նախաձեռնություններին՝ դադարեցնելու Ռուսաստանի և Ուկրաինայի միջև պատերազմը, նաև ընդգծել, որ Թուրքիան պատերազմի սկզբից ձգտել է արդար և կայուն խաղաղության և կշարունակի դա անել»,- ասվում է թուրքական կողմի հաղորդագրության մեջ։
Էրդողանը նաև նշել է Սիրիայի նկատմամբ պատժամիջոցների չեղարկմանն աջակցությունը՝ կայունությունը վերականգնելու, նոր վարչակազմի գործունեությունն ապահովելու և կարգավորմանը սատարելու համար։ Թուրքիայի նախագահը նաև ասել է՝ Անկարան ակնկալում է, որ Միացյալ Նահանգները քայլեր կձեռնարկի ահաբեկչության դեմ պայքարում այնպիսի մոտեցմամբ, որը հաշվի կառնի Թուրքիայի շահերը նոր դարաշրջանում։ Էրդողանը նաև հավելել է, որ CAATSA-ի պատժամիջոցների չեղարկումը, F-16-ի գնման գործընթացի ավարտը և F-35 ծրագրին Թուրքիայի մուտքի ապահովումն անհրաժեշտ են պաշտպանական արդյունաբերության ոլորտում երկկողմ համագործակցության ամրապնդման համար։
Հավելենք, որ Սպիտակ տունը երկու երկրների նախագահների հեռախոսազրույցի վերաբերյալ դեռ պաշտոնական հաղորդագրություն չի հրապարակել։
Թարգմանությունը՝ Էմմա Չոբանյանի
