09.07.2026 | 16:25
Չարենցավանի ոստիկանները թմրանյութ տեղադրողների են ձերբակալել գերեզմանոց տանող ճանապարհին
ՀՀ-ն 750 մլն դոլարի եվրոպարտատոմսեր է թողարկել․ Ֆինանսների նախարարությունն ինչու ժամանակին այդ մասին չի տեղեկացրել
14.03.2025 | 21:02
Հայաստանը տեղաբաշխել է 750 մլն ԱՄՆ դոլարի եվրոպարտատոմսերը։ Ֆինանսների նախարարությունն այսօր հայտարարել է, որ միջազգային կապիտալի շուկայում տեղաբաշխումը տեղի է ունեցել մարտի 5-ին և հաջողությամբ է անցել։
Եվրոպարտատոմսերի մարման ժամկետը 10 տարի է, եկամտաբերությունը՝ 7.1%: Նոր եվրոպարտատոմսերի արժեկտրոնի եկամտաբերությունը 6.75% է:
Սա Հայաստանի կողմից միջազգային կապիտալի շուկայում եվրոպարտատոմսերի հինգերորդ թողարկումն է: Ըստ նախարարության՝ եվրոպարտոմսերի թողարկումը նախատեսված է 2025 թ-ի պետական բյուջեի մասին ՀՀ օրենքով, ներառված է 2025 թ-ի փոխառությունների ծրագրում: Եվրոպարտոմսերի թողարկումից ստացված զուտ հասույթը կօգտագործվի պետական բյուջեի դեֆիցիտի ֆինանսավորման նպատակով:
Հասարակական գործիչ Արթուր Դանիելյանը պարտատոմսերի այս թողարկումը բնորոշել է որպես՝ «խաղաղության պայմանագրի զիջումների համար գին»։ Ֆեյսբուքյան իր էջում Դանիելյանը գրել է, թե «հույժ գաղտնի» է պահվել ինֆորմացիան․
«Գաղտնի էր դա, քանի որ նույնիսկ մեծ ջանքեր դնելով հնարավոր չէ ուղիղ կապը չտեսնել մարտի 12-ին պարտք ուզելու ու դրա հաջորդ օրը Ադրբեջանին զիջումների մասին հայտնելու մեջ․․․»։
ACSES վերլուծական կենտրոնի ղեկավար, տնտեսագետ Հայկազ Ֆանյանի դիտարկմամբ՝ տարօրինակ է, որ նախարարությունն ուշ է տեղեկացրել եվրոպարտատոմսերի թողարկման մասին, սակայն, ըստ նրա, մասնագիտական շրջանակներն իմացել են այդ մասին:
«Պարտատոմսերը նորմալ տեղաբաշխվել են։ Պահանջարկը 2․6 մլրդ դոլար է եղել, և 750 մլն դոլարն արդեն խոսում է նորմալ տեղաբաշխման մասին։ Եթե համադրենք Թուրքիայի հետ, ապա լավ պայմաններ են»,- Factor.am-ի հետ զրույցում ասել է Հայկազ Ֆանյանը։
Թե ինչո՞ւ է ֆինանսների նախարարությունն ուշացումով հայտարարել եվրոպարտատոմսերի թողարկման մասին, Factor.am-ը հարցում է ուղարկել նախարարություն։ Պատասխանը ստանալուն պես՝ այն կհրապարակենք։
Գայանե Խաչատրյան
