Հայտարարագրումը չի՛ չեղարկվում․ տարածված տեղեկությունը սխալ է

Եկամուտների հայտարարագրման պահանջը չի չեղարկվում, համացանցում տարածված տեղեկությունը սխալ է։ Ապատեղեկատվության տարածման առիթ է տվել այն, որ ԱԺ «Հայաստան» խմբակցությունն է ֆինանսների նախարարությանը առաջարկել չեղարկել ֆիզիկական անձանց եկամուտների համընդհանուր հայտարարագրման համակարգը, որը սակայն ֆինանսների նախարարությունը անընդունելի է համարել։ Այս մասին Factor TV-ին տեղեկացավ Ֆինանսների նախարարությունից։

«Նախագիծը չի բխում ՀՀ կառավարության 2021–2026 թթ. ծրագրով սահմանված քաղաքականության ուղղություններից, ըստ որի` ներդրվելու է ֆիզիկական անձանց եկամուտների հայտարարագրման գործուն համակարգ, որը կնպաստի նաև միջազգային պրակտիկայում լայնորեն կիրառվող «սոցիալական կրեդիտների» համակարգի ներդրմանը»,– նշված է կառավարության որոշման մեջ:

Այսինքն, կառավարության այսօրվա նիստի չզեկուցվող հարցերից մեկով կառավարությունը ոչ թե ընդունել է հայտարարագրման համակարգը չեղարկելու առաջարկությունը, այլ այդ առաջարկի անընդունելությունը։

Հիշեցնենք, որ գրանցված աշխատողները իրենց 2024 թվականի եկամուտների մասին պետք է  հայտարարագիր ներկայացնեին մինչև մայիսի 1-ը։ Ավելի ուշ հայտարարագիր լրացնելու ժամկետը երկարաձգվեց մինչև նոյեմբեր։  Հայտարարագրման շրջանակում կա նաև սոցիալական կրեդիտների վերադարձի հնարավորություն, որը յուրաքանչյուր անձի մասով կարող է կազմել առավելագույնը 100 հազար դրամ։

Հունվարի 1-ից մինչև 10-ը համընդհանուր հայտարարագիր լրացրած 4509 քաղաքացի հետ է ստացել 420 միլիոն դրամի սոցիալական կրեդիտ։ Այս մասին հայտնել էր Նիկոլ Փաշինյանը, որը պարբերաբար ֆեյսբուքյան էջի գրառմամբ թարմացնում է սոցիալական կրեդիտից օգտված քաղաքացիների տվյալները։ 

Անի Թամրազյան